Panamilit sa pabuto
Duna mi silingan nga nailhan nga usa sa tigpalit ug tigduslit sa labing mahalon, mabulukon ug taas og lahutay nga mga pabuto sa pagsugat sa Pasko ug Bag-ong Tuig.
Karong bag-o, nakapalit siya og laing pinuy-anan sa laing dapit ug tagsa na lang namo siya nga igkita. Ang kaniadto hayag niya nga balay, karon mingaw ug ngiob na.
Human nitambong sa misa sa Bag-ong Tuig, nakit-an nako nga labihang hayaga sa iyang bay ug gipalibotan sa nagparada nga mga sakyanan. Nalipay ko nga gipili niya ang iyang karaang balay nga maoy pahigayonan sa party uban sa iyang mga suod pagsugat sa Bag-ong Tuig.
* * *
Kay wa man ko makatulog dayon human nitambong sa party sa pamilya sa lain namong silingan, nakahukom ko nga magpaabot na lang sa mga pabuto sa pagsugat sa Bag-ong Tuig. Usa sa akong gipaabot kun sama ba gihapon kamabulukon ug kadugay mahuman ang mga pabuto nga giandam sa karaan namong silingan.
Apan usa ka oras sa wa pa ang tungang gabii, nakit-an nako nga nanganaog silang tanan paingon sa ilang mga sakyanan, nagbitbit og mga butang gikan sa party, nanakay ug nag-iyahay pagpanggawas. Tingali nag-apas nga dili pa kaayo daghan ang magpabuto sa kadalanan ug adto mosugat sa Bag-ong Tuig sa bag-o nilang pinuy-anan.
* * *
Way atop ang ibabaw nga bahin sa among bay mao nga bantang ang tanang pabuto sa tulo ka dakbayan sa Sugbo, Mandaue ug Lapu-Lapu, ingon man sa kalungsoran sa amihanang Metro Cebu. Ganahan ko nga motan-aw, apan dili ganahang mamalit ug labaw na nga talawan sa pagduslit. Mao nga sa makausa pa, nagpasalamat sa hilom sa mga silingan nga isog ug dili tihik.
Sa nangaging Bag-ong Tuig, nitadlas ang mga kuwitis sa among ibabaw ug mas duol ang mga silaob sa nagkalainlaing bulok ug kagahob. Apan sa niaging Enero 1, mas layo nang mga pabuto ug mas dali nang nahuman. Pagbaktas nako paingon sa trabaho nga kadlawon pang dako, mas gamay ra ang nagpasad nga mga papel sa pabuto.
* * *
Dili among mga silingan ra ang nanamilit sa mga pabuto. Napamatud-an ni sa dakong pagtidlom sa halin sa mga pabuto ug sa mga nabuthan nga nadala sa mga tambalanan. Huwaton ba nato nga makaamgo na ang tanan nga may mas makahuloganon nga mga paagi, nga mas luwas kay sa mga pabuto, sa pagsugat sa Bag-ong Tuig?
O ipatuman na ang sugyot ni Health Secretary Janette Garin nga “ban” sa mga pabuto sa 2017 ug gamiton ang usa ka tuig nga lugway sa pagpangita og alternatibong mga panginabuhi alang sa mga pamilya nga nagsalig sa industriya sa pabuto?
Nidason dayon si Chief Superintendent Manuel Gaerlan, hepe sa Police Regional Office sa Central Visayas, kinsa nikumpisal nga ang legalisasyon wa makahimo nga luwas sa mga pabuto.
- Latest
