Sa miaging Lunes, Disyembre 28, usa ka yanong programa ang gihimo sa SCOOTER, kon Senior Citizens Open Organization Towards Effective Reform, pagsaulog sa Pasko ug pagsugat sa Bag-ong Tuig.
Gibuksan ang tulomanon sa mubo nga mga pakighimamat ug welcome address nila ni OSCA head Doming Chaves ug SCOOTER chairman, Dr. Nick Maglasang.
Gitambongan sa kapin 60 ka haliging senior citizens sa SCOOTER, ang nanambong gilingaw sa mga awit nila ni Pauline Abas sa Tisa, ug Milagros Bernardino sa Bulacao ug sa pagsayaw sa mga mahiligon sa sayaw, diin si Dr. Maglasang, ug Mary Aleonar, presidente sa Kamagayan Seniors Association, mihatag og ganti sa mga graceful pairs nga nakalingaw pag-ayo sa mga nanambong.
Nakadawat sa ganti ang mga pares nila ni Boy Antig sa Capitol Site ug Flor Pesquera sa Kinasang-an; ug Mateo Suson sa Parian ug Bebie Brillantes sa Pahina San Nicolas.
Bisa’g medyo gahi na tan-awon ang kalawasan, apan nagpabilin gihapon ang grace sa mga nanayaw.
Namulong ug mihatag sa ilang mga mensahe ug inspirational talks sila si Mayor Mike Rama, Vice Mayor Edgar Labella ug Konsehal Gerry Carillo.
Ang ilang presensiya nakadugang sa kasadya sa okasyon.
Mihatag usab og hamubong paambit si Lando Llaguno, former OSCA Head sa Cebu City. Ang emcee si Gng. Norma Llaguno.
Kinsay nag-ingon nga ang mga Senior Citizens dili na makapahigayon og makalingaw nga kalihokan?
* * *
Indigent senior citizens. Ang House of Representatives miaprobar sa usa ka balaudnon nga mag-amendar sa RA 9994, kon Expanded Senior Citizens Act of 2010, nga maghatag og mas klaro nga definition sa indigent senior citizens.
Matud ni Rep. Angelina Tan sa Quezon City, ang principal author sa House Bill No. 5752 , “the measure would provide a more inclusive definition of Indigent Senior Citizens.”
Unsa man ni? “Any elderly who is without pension or permanent source of income, compensation, or regular and appropriate financial assistance from his/her relatives to support his/her basic need, as determined by the Department of Social Welfare and Development in consultation with the National Coordinating Board.”
So, specific ug klaro kaayo. Wala nay kahinguhaan ug walay permanenting tabang gikan sa kaparyentehan. Giwagtang ang provision sa RA 9994 nga “frail, sick, and disabled.” Sa ato pa, bisag lig-on pa, basta wala nay kahinguhaan, mo-qualify sa mga assistance.
Ubos ning maong balaudnon, ang mga indigent senior citizens aduna nay kaseguroan nga kahatagan sila, whatever assistance nga itunol sa kagamhanan.