Ang buta kun maibog

Maglisud kita sa pagtuo nga ang usa ka buta, maantigo pa diay mobati og kaibog. Nakaingon ta niini kay nasayud man kita, nga dili na sila makakita. Apan ang buta kun maibog, nakakita kini pinaagi sa pagpukos sa iyang panghunahuna nga wala magsalig sa makita sa mata, kundili sa pagpamatyag.

Maoy gigamit sa buta ang uba'ng mga sentido (senses) sama sa paghikap nga himason ang gikaibgan, nga nadani sa kaalimyon sa babaye. Dugangan sa paraygong tingog, mainiton gihapuhap ang kahiladman sa iyang pagkatawo. Maingon man ang pagtuyhakaw sa kahinam isip tawong normal sa pagseks.

Ang kaibog sa buta, may masinati usab siya'ng gugma ngadto sa babaye nga may gusto kaniya nga nakig-unong sa iyang sitwasyon, nga nigiya kaniya nga matagamtaman ang kaanindot batyagon ang kalibutan, bisan gihikawan sa panan-aw. Apan ang ilang kasingkasing ug panghunahuna, maoy kaabag nila sa tanan nga makabatyag kalalim sa kalipay, sama sa niadtong aduna'y mga mata.

Gani, daghan ko'g nakaila'ng mga buta nga sakop sa Cebu Blind Assn. sa Banilad, nga sagad nanimuyo sa may Busay, nga naa sa bakiliron pa'ng mga pinuy-anan. Ang uban nila malampuson sa ilang pamilya.

Mga gwapa og asawa, mga propesyonal o may trabaho ang mga anak, nga karon nakatabang na nila.

Diha'y higayon nga nahinabi ko ni sila, namatikdan kong mora sila'g may mga mata kay normal kaayo ang ilang panlihok. Nga matud nila, ang ilang panan-aw, mao na ang utok o hunahuna, nga maoy nagsilbi nilang mga mata. Mas segurista sila sa pagdesisyon, nga mainampingon sa makuting proseso.  Mga kugihan kay mamatay sila nga di mulihok o modiskarte.

Sagad nila adunay gipokus nga abilidad aron lang mabuhi. Tungod sa kaibog, ang gugma  sa buta milambo, nga maoy nakapalig-on sa panumpa nga puno sa paglaum.