Plano sa Department of Health (DOH) nga ipatuman ang total ban sa pagpabuto sa mga selebrasyon, ilabi na sa pagsugat sa Pasko ug Bag-ong Tuig, aron wala nay kinabuhi nga makalas, wala nay maputlan sa mga tudlo, mabuta o sa bisan unsang matang sa disgrasya resulta sa pagpabuto.
Kun duna may magpabuto kinahanglan nga mga propesyonal o mga eksperto ang mopahigayon niini. Kining maong plano dugay na kaayo apan hangtod karon wala pa hingpit mapatuman.
Ambot kun niining panahona may motinuod na ba sa pagpatuman sa total ban sa mga pabuto.
Bisan sa hiningusgan nga kampanya sa DOH batok sa pabuto nga gipakita pinaagi sa mga TV commercial ug sa testimoniya sa mga nabuthan, para nako wa kini hingpit makatuhop sa kinabag-an nga gusto nga malingaw diha sa pagsaba-saba gamit ang pabuto.
Siguro dunay nakasabot apan kadaghanan nibaliwala sa maong matang sa kampanya tungod kay wala sila hingpit maedukar sa kadautan nga mamugna sa mga pabuto.
Kun hingpit pa nga nasabtan sa kadaghanan ang dautang epekto sa pabuto diha sa TV commercials ug ubang matang sa kampanya sa DOH batok niini, wala na gyud unta kita’y madunggan pa nga buto-buto.
Bisan kun sa pagsugat sa Pasko gikalipay sa DOH nga gamay na lang ang mga nabuthan, apan ang kamatuoran mao nga may nabuthan gihapon ug daghan pa ang wala makasabot sa ilang kampanya.
Human ko nakasimba niadtong adlaw sa Pasko, samtang nag-atang ko og PUJ may pundok sa mga batan-on nga sa akong bana-bana dunay nag-edad og 15 ug ang labing gamay sayes-anyos nga nagdagan-dagan, mura og nagdakop-dakop.
Taod-taod may nagpito. Whistle bomb diay nga ilang gipabuto. Taliwa sa ilang kalingaw ug sa kinataw-anay, moalibwag sila sa pagpanagan taliwa sa daghang tawo nga magsulod-gawas sa simbahan. Ang resulta, makadasmag sa mga naglakaw, makatunob sa tiil ug makamugna og kahadlok sa mga walay kalibutan sa ilang gihimo, ilabi na kun makabuto na ang whistle bomb.
Apan ang kahasol ug kasamok nga nahimo sa maong mga batan-on ngadto sa uban, wala nila makita ug wala nila mahibaw-i tungod kay ang ilang gihuna-huna mao ra man ang kaugalingon nilang paglipay-lipay.
Sama ra usab na sa mga nangapungkol, nabuta o ba kaha naparalisado na human madisgrasya sa mga pabuto. Gibaliwala lang ang kapeligro sa ilang gibuhat aron lang gyud makiuso sa mga nagsadya sa pagpabuto. Resulta, tibuok kinabuhi nga pagmahay.
Kun nahimo sa Davao City nga walay magpabuto sa Pasko ug Bag-ong Tuig nganong dili kaha na mahimo sa ubang bahin sa nasud? Dili sa kasaba sa pabuto masukod ang kalipay sa pagsugat sa Pasko o sa Bag-ong Tuig.
Labaw sa tanan ang maong matang sa kasaba dili mao ang matang sa pagpadayag sa kalipay sa Pasko. Ang kalipay sa pagsaulog sa Pasko mapakita ug mapadayag diha sa pagsinabtanay, sa pagpasaylo, pagpasalamat ug pangaliya alang sa kaayohan sa isig-katawo.