Maayo ba ang atong Pasko?

Samtang naghuot na ang mga tindahan ug migrabe na kahuot ang kadalanan tungod sa kadaghan sa katawhan nga na-busy sa pagpamalit og pinaskohan ug sa pagtambong sa mga nagkadaiyang Christmas party, ang uban nagkusmod pa ang simod ug kabitayan og kaldero ang dagway.

Kini tungod kay wa sila’y madawat nga kalipay gikan sa kompaniya nga ilang gitrabahoan.

Ang balaod nag-ingon nga ang mga kompaniya mohatag og 13th month pay ngadto sa ilang mga kawani sa dili pa ang Pasko.

Hinuon kadtong mga kawani sa patigayon nga ilang gitrabahoan nga wala makaabot og lima o napulo ka kawani, walay labot sa paghatag og 13th month pay. Apan wa ni magpasabot nga gidid-an sila sa paghatag kun gusto sila nga mohatag.

Sa mga kompaniya nga wala gyud mokita, makasabot ra seguro ang mga kawani kun dili sila makadawat og 13th month pay, apan sa mga kompaniya nga dagko og ginansiya pero wala mohatag og 13th month pay dili gayud makasabot kanila ang ilang mga kawani mao nga ning panahona bug-at kaayo ang ilang mga dagway.

Ang mga balay-patigayon nga wala mohatag sa benepisyo nga gisita sa balaod alang sa mga kawani, suwapang ug wala moila sa natampo sa ilang mga kawani sa pagburot sa ilang mga bulsa ug negosyo.

Angayan nga tan-awon ug ilhon sa mga magpapatigayon ang kabililhon sa natampo sa mga kawani sa ilang negosyo. Atong pahinumdoman ang mga magpapatigayon nga ang paglambo sa negosyo resulta ug mugna sa nagtambayayong nga mga anak sa singot ug kapitalista.

Wala’y negosyo nga molambo ug modako kun walay kawani. Sama nga wa usa’y mga kawani nga makabarog kun walay mga patigayon nga mihatag kanila og trabaho. Mag-ilhanay lang unta sa ilang mga natampo ang kapital ug ang mga anak sa singot.