Sa kadaghan sa gisulti ug gihimo sa suspendidong si Cebu City Mayor Mike Rama sa iyang pagtuman sa preventive suspension order nga giluwatan sa Malakanyang, gawasnon ang mga sakop sa media o si bisan kinsang nitambong sa kalihokan niadtong Biyernes sa hapon sa pagmantala sa bisan unsang hulagway nga ilang nakuha o pamahayag nga ilang nakutlo.
Maong way sukaranan ang mga sipsip ni Rama sa pagreklamo nga ang nahimong viral sa social ug mainstream media mao ang hulagway sa mayor nga wa nay barong, nagluhod, nagkupot og mikropono, morang naghilak ug nagpahiyom sa samang higayon ug nakahigayon pa gyud sa pagtan-aw sa kamera.
* * *
Nipasangil ang pipila ka dumadapig ni Rama nga ang mga sakop sa media ug netizens nga nakakuha sa hulagway morang mga buaya nga nag-atang sa daplin ug nagpaabot lang og sipyat sa gisulti ug gihimo sa mayor aron gamiton batok niya. Ambot modason ba si Rama nga mga buaya ang mga sakop sa media ug netizens nga naglibot niya. Ang kadagkoan sa City Hall maoy nangimbitar nila. Nahibawo si Rama nga ang tanan niyang sulti ug lihok atubangan sa gatosan niya ka dumadapig nakuha sa mga mikropono ug mga kamera. Nahibawo sab si Rama nga di siya kabuot unsa sa kaliboan ug usa ka sulti ug letrato ang ipagawas sa publiko.
* * *
Makareklamo lang ang kampo ni Rama kun giusab ang iyang letrato o kun gilubag ang iyang sulti. Apan tinuod siyang niluhod ug tinuod nga gitandi ang iyang kaugalingon ngadto sa Ginoo nga gilansang sa krus.
Nisugyot ang dakong opisyal sa City Hall nga ang gipagawas unta mao ang mga letrato ni Rama nga tuyhad nga nagdiskurso o naglingkod uban sa iyang mga abogado. Apan di mahimong ipagawas ang kinatibuk-ang diskurso, o video, o photo album sa kalihokan. Samang gipili sa mga sakop sa media ang wa pag-apil sa mga adlib sa mayor nga gawas nga way labot nahug nga bugalbugal sa okasyon.
* * *
Usa ni sa problema ni Rama. Di siyang kahibawo unsaon pagdiretso sa punto ug kanus-a mohunong og istorya. Wa magkuwang ang iyang mga magtatambag sa pagbadlong. Apan kinsa man silang magbuot sa estilo sa mayor?
Nakapait mao nga ang media maoy giisip nga sad-an sa mga higayon nga manggawas ang mga pakauwaw ni Rama. Pila na ka higayon nga gipasanginlan ko sa suod niyang mga higala nga akong gilawgan ang mayor og mga pangutana aron nga makabuylo sa pagtulibagbag paghisgot sa mga butang nga way labot. Hinaot nga moangkon sila sa kamatuoran nga si Rama ang naghimo sa iyang kaugalingong mensahe. Usahay makatunong, usahay gubot pa sa lukot, apan posible sang maoy nakapadaog niya sa nangaging mga piniliay.
* * *