Gabukal na ang kaldero sa politika

Sunod tuig pa ang eleksyon, ug wala pay campaign period, apan gabukal na ug init na kaayo ang kaldero sa politika sa tibuok nasud. Grabe na kaayo ang pagtinubagay, pagpamasangil, ug pagpanghimakak sa isig pundok ug mga partido sa politika.

Dinhi sa ato, ang gihugon-hugon nga suspensohon si Mayor Mike Rama, nahinayon ra gyud. Ug tungod sa timing sa pagpasuspenso kaniya, gidudahan nga politically motivated.

Apan, ang iyang mga kaatbang miinsister nga wala’y labot ang politika, ug balido ang pagpasaka og sumbong batok sa Mayor.

Si Rama ang regional coordinator sa United Nationalist Alliance (UNA) nga gipangulohan ni Vice President Jejomar Binay, hinungdan nga ang kampo ni Binay nagduda nga tuyo sa suspension order mao ang pag-paralyze ug pag-neutralize sa political opposition sa Sugbo.

Si Mon Ilagan, tigpamaba sa UNA, namahayag nga ang underhanded ug intimidating nga taktika sa administrasyon, “was politically charged and aimed at harassing rivals of the administration party in the 2016 elections.”

Tubag sa pikas nga kampo mao nga dugay na kining maong kaso, ug sila sa kampo ni Rama ang namolitika pagpaguba sa center island sa Labangon tungod kay BOPK si Kapitan Victor Buendia.

Mipadayon si Ilagan: “You can already smell the stench of political harassment and deceit no matter how much they deodorize and justify the reason for Mayor Rama’s suspension.”

Whatever, ang katawhan na ang mohukom.

* * *

Nagpadayon pagkusog sa pinalitay sa mga sakyanan sa kadalanan. Ang Chamber of Automotive Manufacturers of the Philippines (CAMP) ug ang Trucks Manufacturers Association (TMA) mitaho nga sa mga bulan gikan sa Enero hangtod Nobiyembre, ang sales misaka og 23% karong tuiga pinaagi sa 261,930 ka units nga nahalin, itandi sa 231,427 units sa samang panahon sa miaging tuig. Sa bulan lang sa Nobiyembre karong tuiga, ang halin misaka og 25.9% uban sa 26,979 units, itandi sa 21,422 units sa samang buwan sa miaging tuig.

Kining tanan, naghulagway nga daghang kuwarta ang katawhan, daghang kuwarta ang nag-circulate. Sa ato pa robust ang ekonomiya sa nasud, giisip nga usa sa labing lig-on dinhi sa Pacific region.

Lain nga timailhan pagsulbong sa ekonomiya sa nasud, mao ang uswag sa mga bangko sa tibuok nasud. Ang China Banking Corporation pananglitan, mibukas og napulo ka bangko sa usa lang ka adlaw didto sa Metro Manila, usa dinhi sa Sugbo, ug sa mga dakbayan sa Quezon, Makati, ug San Juan. Karon, aduna na sila’y 342 branches nationwide.