‘Timing’ sa pamolitika

Sa mosugot o sa dili ang administrasyon, ang bisan unsang lakang o mga aksyon sama sa pagdisiplina ilabina na sa mga politiko nga kontra partido sabton gyud nga pamolitika. Ilabi na karon nga lima ka buwan na lang og election na, mas mograbe pa ang kainit sa pamolitika.

Busa kining kamandoan sa Malacanang nga gipirmahan ni Executive Secretary Paquito Ochoa Jr. nga nagpasuspenso ni Mayor Mike Rama sa dakbayan sa Sugbo og 60 ka adlaw, sabton gyud sa mga dumadapig ug mismo ni Mayor Rama nga siya gipamolitika  sa administrasyon.

Si Rama naa sa kampo ni UNA standard bearer Bise-Presidente Jejomar Binay. Samtang ang kaatbang ni Rama sa pagka-mayor sa dakbayan sa Sugbo kanhi mayor ug kanhi kongresista Tomas Osmeña sa BOPK, kaalyado sa Liberal Party nga maoy partido sa administrasyon.

Gibasehan sa pagsuspenso ni Rama mao ang reklamo ni Barangay Kapitan Victor Buendia sa Labangon nga gipaguba sa mayor ang P300 mil nga balor sa “median structure” nga susama’g center island ug street lighting nga ilang gitukod sa dalan Katipunan sa niaging tuig.

Pagpanglupig ug pag-abuso sa gahum ang mga kasong administratiba nga giatubang ni Rama atubangan sa buhatan sa presidente.

Kining 60 ka adlaw nga suspension order giluwatan ni Ochoa niadtong December 2 samtang wala sa dakbayan sa Sugbo ang mayor tungod kay atoa siya sa Paris, France nitambong sa tigum kauban sa mga lider sa ubang kanasuran nga nagtuki sa mga lakang aron mamenosan ang dakong epekto ug kadaot nga mamugna sa climate change.

Hinuon nahatagan sa due process ang mayor sa maong reklamo tungod kay gipatubag siya labot niini. Gawas pa, dili pa kini pinal tungod kay makapangayo pa og rekonsiderasyon si Mayor Rama.

Apan nunot niining labing bag-ong kalamboan sa pamolitika sa dakbayan sa Sugbo, dili malikayan ang pagtumaw sa daghang mga pagduda sa motibo sa administrasyon , nganong karon gitayming nga nagkaduol na ang election sa pagpagawas sa suspension order; nganong nagkadaghan ang reports sa mga kontra-partido nga mga politiko nga mag-atubang og mga imbestigasyon sa kurapsyon; ug nganong ang mga kontra-partido ra ang kasagarang mapahamtangan sa disciplinary actions?

Kining suspension order batok ni Mayor Rama sa akong nahinumdoman sa iyang mga pamahayag kaniadto, iya nang gipaabot  human siya nikalas sa Liberal Party ug nagpasakop sa United Nationalist Alliance kon UNA ni Binay.

Apan kining pagdisiplina sa mga makasala nga mga politiko o ni bisan kinsa nga mga kawani o opisyal sa gobiyerno sa wala untay pagpinig kun unsay bulok sa politika, patas nga mapatuman kun katunhayan sa panerbisyo ang tinuoray nga gibugtaw sa mga anaa sa gahum.