May tawo na nga nagpakabana ug mihatag og inpormasyon kabahin sa pag-refill og Liquified Petroleum Gas (LPG) sa mano-mano nga paagi diha kilid sa usa ka ilado kaayo nga beach resort sa Barangay Jubay, Liloan.
Apan wala gihapon kini hatagi og aksyon sa mga tinugyanan sa kagamhanan, mahimong sa Department of Energy (DOE), kapolisan, kabomberohan ug sa kadagkoan sa lungsod.
Nagpadayon gihapon ang mao nga kalihukan bisan og gitawag na sa media ang atensyon sa mga opisyal sa kagamhanan niining gihulagway sa mga namuyo sa maong dapit nga peligroso kaayo.
Gusto pa ba diay sila nga adunay mahitabo usa sila mohimo og aksyon? Ngano nga dili man mohimo og pro-active measure ang kapolisan, kabomberohan ug ang mga opisyal sa lungsod?
Samtang dili angay’ng wad-on kining Butane/LPG canisters apan kinahanglang estriktohon sa kagamhanan nga idili ang pag-refill niini sa mga tawo nga walay kasinatian sa trabaho ug sa dili tukma nga dapit aron dili makamugna og peligro.
Hangtud karon aduna pay nagpadayon pag-deliver niining mga refilled nga Butane canister luwan sa mga motorsiklo, samtang ang mga tindahan nga namaligya og LPG-refilled canisters mibuwad ra sa ilang produkto sa init.
Sa pagbuwad nila sa init mosaka ang temperature sa LPG sulod sa canister ug kuyaw kaayo nga mohungaw ug makamugna og sunog.
Sigurado nga ang mga local nga opisyal magpanuko paggukod niining mga tawo nga nalambigit sa pag-refill og Butane canister diha sa mga palibot sa balay tungod kay hapit na ang eleksyon. Apan palabihon ba diay ninyo ang personal interest kay sa kaluwasan sa mga tawo nga makalikay sila sa sunog? Ang mga backyard LPG refillers angay gayud nga hugtan sa pagkampanya.