Aron pagsumpo sa masiao nga ang winning combination gikuha gikan sa resulta sa Lotto, ang Philippine Charity Sweepstakes Office (PCSO) mihatag og pagtugot nga maka-operate ang Cebu Tres dinhi sa Sugbo. Sa unang higayon, mipakatap ang tagdumala sa Cebu Tres og dul-an sa 2,000 ka “ushers” nga adunay mga identification cards nga giisyu gyud sa PCSO ug nag-uniporme aron pagpaila nga dili sila ilegal.
Apan wala magdugay giundang sa tagdumala sa Cebu Tres ang pagpakatap og mga ushers kay daghan kanila ang gipanghulga sa mga ushers sa masiao, kang kansang ilegal nga negosyo naapektahan.
Pagka karon, mikatap na pag-ayo ang mga ilegal swertres dinhi sa Sugbo ug gipasagdan ra kini sa kapolisan. Daghan ang nagtuo nga nasubornohan sa mga masiao operator ang mga polis mao nga sama ra sila sa mga buta nga wala makakita sa dakponon.
Dinhi sa dakbayan sa Sugbo, wala malilong ngadto ni Mayor Michael Rama ang pagdagsang sa masiao nga ang winning combination adto ibase sa resulta sa Lotto.
Samtang gilatid sa Republic Act 8551, Section 63 (4) (iii) nga ang “control and supervision of anti-gambling operations” anaa gisalig sa mga local government executives, si Mayor Rama ug ang ubang mga mayor wala motinuod pagmando sa kapolisan nga kampanyahan ang mga nagpasiugda sa masiao.
Subo kaayo palandungon ang report nga duna pa gani mga mayor nga nakigkunsabo sa mga nagpadagan og masiao diha sa tagsa-tagsa nila ka dapit. Ang mga mayor gihatagan og gahum ug giisip nga mga “deputies” sa National Police Commission aron sila makahimo pagmando sa mga polis diha sa tagsa-tagsa nila ka dapit. Apan daghang mga mayor ang wala mogamit niining maong gahum aron sumpoon ang ilegal nga kalihukan ug mas maayo pa nga sila langkatan sa mao nga gahum.