Maldisyon sa trapik

Atol sa pag-abli sa usa ka dako nga shopping mall diha sa South Road Properties niining dakbayan sa Sugbo sa niaging semana, grabe nga paghuot sa trapik ang nasinati sa kadalanan sa siyudad.

Siguro mao kadto ang labing grabe nga trapik nga nasinati sa dakbayan. Halos tanang nag-unang karsada sa downtown duol sa SRP ug pipila sa uptown area, ilabina sa Fuente Osmeña, ang naghuot niadtong tungora.

Klarong walay konkreto nga measures nga gipatuman ang mga traffic officials ning dakbayan aron malikayan ang kahuot sa kadalanan niadtong tungora. Klaro nga nagkulang ang ilang pagpangandam  sa pag-abli sa maong mall, ang labing dako sa nasud gawas sa Metro Manila.

Sa akong nakita, wala magsilbi ang ilang lakang alang sa han-ay nga dagan sa trapiko niadtong tungora. Wala nila nalantawi nga ang problema sa dagan sa trapik didto sa SRP mokatay diay ngadto sa ubang lugar tungod sa dakong bul-og sa katawhan nga nagpanon ngadto sa bag-ong mall.

Karong pipila ka adlaw, adunay dakong shopping mall ang moabli usab ning dakbayan. Ug siguradong maghuot na usab ang kadalanan inig hugop sa bagang duot sa katawhan atol sa opening niini diha sa General Maxilom Avenue.

Dili na gayud mabangbang kining maong problema sa trapik ning atong dakbayan ug sa kinatibuk-ang Metro Cebu. Bisan unsa na lamang ang gipatuman sa otoridad pagsulbad niini. Apan pabilin gihapon kining maong maldisyon.

Ambot kun unsay maayong solusyon niini. Dili na ikalimod pa nga nagkulang gayud sa planning ang atong mga opisyales kaniadto kabahin sa pag-modernize sa sistema sa transportasyon sa atong lugar isip pag-anticipate sa nagkadaghang sakyanan nunot sa grabe nga paglambo sa Metro Cebu karon.

Ato na lamang dawaton ang realidad nga dili gayud kini masulbad sa unsa mang rerouting ug widening nga ipatuman sa otoridad. Dako kining krus nga atong pas-anon karon ug sa katuigan pang umaabot gumikan lagi sa kakulang sa panglantaw sa atong mga opisyales kaniadto.