EDITORYAL - Clean Energy

Nangulo si Presidente Benigno Simeon Aquino III sa panawagan sa mga kanasuran aron pagpangita og paagi aron mamenosan ang epekto sa Climate Change atol sa Paris Summit didto sa France sayo niining tuiga.

Ang Pilipinas gihimong ehemplo sa maong panagtigom isip usa ka nasud nga pirmeng maigo sa kalamidad ilabi na karon sa nasinating global warming o ang pag-init na sa klima sa kalibotan.

Gipanawagan usab ang mga progresibong mga nasud nga maghinayhinay na sa paggamit og mga materyales nga makadaot sa kalikopan ug ang pagpangita og mga pamaagi aron matubag ang panginahanglan sa enerhiya nga di kinahanglang maguba ang kalikopan. Ang enerhiya maoy nagpadagan sa kinabuhi karon sa mga tawo, apan ang benepisyong nahatag niini nakaapektar usab sa kinaiyahan tungod sa walay kongkretong mga programa aron kapugngan ang kadaot.

Apan samtang tinuod nanawagan ang Pilipinas sa uban nga moaksyon batok sa global warming, ang gobiyerno adunay gitagoan sa mata sa kalibotan.

Usa ang Pilipinas sa nagsalig sa coal fired, fossil ug natural gas power plants alang sa panginahanglan niini sa enerhiya. Kini nga mga planta kontribyutor sa polusyon nga nakapadugang sa kainit sa klima nga nasinati karon. Maihap pa lang sa tudlo ang gidaghanon sa mga planta nga nigamit og clean energy pinaagi sa renewable energy nga walay dakong epekto sa kalikopan kay wala kini hugaw, aso, abo ug kemikal nga ibugwak samtang nag-andar.

Dinhing dapita kinahanglang mo-invest ang gobiyerno ug ang mga pribadong kompaniya nga magtukod og mga planta gamit ang renewable energy. Gikan sa mga tubig, hangin ug alisngaw gikan sa yuta sama sa geothermal heat, wind energy, ug hydro power.

Busa, aron matinud-anon ang kawsa sa panawagan aron mapugngan ang hingpit nga pagkaguba sa kalibotan, angay nang mohimo og mga polisiya ang nasud nga dili na bisan kanus-a pa tugotan ang pagtukod og mga planta nga nagbuga og polusyon.

Seryusohon unta ang paggamit sa clean energy kay sa pagkatinuod daghan pang mga wala mapusling tinubdan sa enerhiya dinhi sa Pilipinas, ang kulang lamang mao ang political will sa mga lider.