CTU Main Campus, Cebu City — Usa sa giisip namo nga labing bililhon nga bahin sa Grand Halad sa Kapamilya, ang labing dakong piyesta sa libreng mga pangalagad nga ipahigayon na sab dinhi tibuok adlaw karong adlawa, mao ang libreng seminars. Mga eksperto sa nagkalainlaing natad niboluntaryo sa ilang panahon, kinaadman ug kasinatian aron pagtudlo, pagdasig, pagduso sa ilang kawsa ug paghatag og katakos sa mga nanambong pagpalambo sa ilang kahimtang.
Alang namo mas bililhon ang kinaadman kay sa libreng mga tambal ug mga pagkaon ug ubang materyal nga mga halad. Maong nasubo mi nga sa nangaging mga Halad natabonan ang libreng seminars sa ubang mas madanihon nga mga pangalagad.
* * *
Maglisod pakig-indig sa libreng tambal, lugaw, ice cream, tupi ug masahe ang mga seminar mahitungod sa business plan making, backyard gardening ug goat raising. Bugtong makaambas mao ang techno demo skills training sa mga magtutudlo sa Cebu Technological University (CTU) kay ang maluto nga mga putahe ihurot man og pakaon sa mga manambong.
Bisan kadtong mga seminar nilang Cebu City Mayor Mike Rama (event organizing) ug kanhi Mayor Tommy Osmeña (speed reading) wa makadani sa kadaghanan. Nanawag pa mi sa mga magtutudlo ug mga tinun-an aron di mausik ang talagsaong kahigayonan (kay di kada adlaw’ng magsunod og seminar ang labing mabulukon ug nagkasungi nga mga politiko sa Sugbo).
* * *
Dihay higayon nga nisugyot ko nga hingpit na lang nga ibuwag sa Grand Halad ang mga seminar. Maong gisuwayan namo paglusad ang Kapamilya Seminar Festival: Tagduha ka oras nga seminar matag Sabado sa Septiyembre.
Daghang nanambong ug wa na sila maglibog kay klaro na unsay tukion. Apan may nihunghong og reklamo namo nga layo rang ABS-CBN Broadcast Complex gikan sa ilang mga pinuy-anan. Ang kahuot sa trapiko sa Mandaue wa katabang pagdasig nila pagtambong sa umaabot pang mga seminar. Gawas pa, lisod pagkumbinser sa among kaugalingon pagpadayon sa festival nga tagsa ra ka seminar ang mapahigayon tungod sa kaapiki sa among luna.
* * *
Maong sa Grand Halad karong adlawa, gawas nga padayon namong giipon mas daghan pa gyong seminars ang dungan nga ipahigayon sa nagkalainlaing classrooms dinhi. May lahi hinuon ming gihimo: Nakiglambigit na ming daan sa mga sektor nga labing makapahimus sa seminars aron madasig ang ilang mga sakop sa pagtambong.
Pananglitan, sa seminar sa Katarungang Pambarangay ug sa Violence Against Women and Children (VAWC) sa University of San Carlo (USC) College of Law, giawhag namong mga opisyal sa barangay sa pagpatambong sa ilang mga sakop sa Lupong Tagapamayapa ug mga kawani sa Gender and Development (GAD) office. Hinaot nga di makawang ang bililhong katigayonan sa kinaadman sa kapin sa 30 ka seminars nga dungang ipahigayon tibuok adlaw karong adlawa.