EDITORYAL - Magmalinawon unta, may BBL o wala

Dako karong hagit sa mga rebeldeng Muslim ilabi na sa Moro Islamic Liberation Front sa Mindanao ang ilang gisaad nga dili na mobalik pa sa armadong pakigbisog aron makab-ot ang ilang gitinguhang tinud-anay nga awtonomiya.

Kini tungod kay base sa dagan sa pag-irog sa Bangsamoro Basic Law diha sa Kongreso, paspas pa ang suso itandi sa pagtuki niini sa mga magbabalaod tungod sa kadaghan sa mga sesyon nga way quorum.

Naabtan na man gud ang BBL sa gitawag nga election fever sa mga magbabalaod nga nag-iyahay na lang karon og lakaw aron iduso ilang mga kaugalingon sa mga botante alang sa 2016 elections.

Sensitibo kaayo kini nga isyu ilabi na sa mga gustong magpapili pag-usab sa umaabot nga piniliay, kay basin og ang ilang baruganan di mauyonan sa ilang mga konstituwente ug di na hinuon sila makadaog.

Hinuon sa paglibot-libot sa peace adviser sa MILF nga si Mohaqher Iqbal sa nagkadaiyang lugar sa nasud, makadaghang higayon niyang gibalik-balik nga dili na sila modangop sa armadong pakigbisog ug mosalmot na lang sila sa mga politikanhong kalihokan sama sa eleksyon. Siguro mahimo kini alang kanilang mga nangaraan na sa pakigbisog tungod sa ilang mga edad, apan unsaon man kaha kini pagdawat sa mga kabataang mga Muslim nga nahikawan gani sa ilang edukasyon tungod sa maong way kahumanang gubat?

Naanad na man silang magsige og pas-an og armas sukad nga sila nagkabuot ug kadaghanan kanila wala na gani makahuman og hayskul, mas pa sa kolehiyo tungod sa pagsige og gubat sa ilang lugar.

Maayo na lang unta 'to kun ma-busy sila sa laing butang kun mahatagan sila og sensirong awtonomiya kay mapuslan pa sila sa nasud.  Sa makausa pa, unsa kahay sangpotanan kun di gyud mapasar sa termino ni Aquino ang BBL? Ig-ampo na lang nato nga di na gyud mabalik ang kagubot sa Mindanao tungod lang niini.