Dili angay’ng lalison pa nga kinahanglang protehean usab nato ang kakahoyan. Ang kahoy motabang nga mahimong presko ang hangin nga atong mahanggap ug maghatag usab kini og kabugnaw sa palibot.
Apan adunay mga higayon nga kinahanglan gyud nga putlon ang kahoy aron kapanalipdan usab ang kinabuhi sa mga tawo. Dili usab malalis nga ang kinabuhi sa tawo mas bililhon gyud kay sa kinabuhi sa mga kahoy.
Ang kadagkoan sa Department of Public Works and Highways (DPWH) nagmugna og bag-ong aseras kilid sa compound sa Technical Education Skills and Development Authority (TESDA) diha sa Salinas Drive sa Lahug.
Apan ingon sa wala’y kapuslanan ang gihimong aseras sa DPWH tungod kay ang kadagkoan sa Department of Environment and Natural Resources (DENR) wala mosugot nga pamutlon ang mga kahoy nga anaa gayud taliwala sa gimugna nga sidewalk.
Angay’ng balansehon usab sa kadagkoan sa DENR ug gamiton ang ilang utok nga mas bililhon ang kinabuhi sa mga tawo nga posibleng maligsan kun anha sila molakaw sa karsada.
Kun tinuod gyud nga ang kadagkoan sa DENR nagproteher sa kakahoyan, motungas sila sa kabukiran kay adto nila makita nga ang mga tawo namutol og mga kahoy nga wala’y pagtugot kay aron idapat sa ilang balay.
Wala gani sila makabantay sa usa ka punoan sa karaan nga kahoy kilid sa usa ka hotel sa eskena Escario ug Gorordo Avenue nga kalit lang nahanaw sa mga mata sa katawhan kay gipuok gyud sa pagputol.
Dunay mga kahoy nga kinahanglan na gayud nga putlon kay makahatag kini og kakuyaw. Kun adunay mangayo og pagtugot nga kini maputol, dili nila kuti-kutihon aron ipalutaw nga sila kunohay gamhanan.