Usa ko sa gatusan ka mga Pilipino nga nagbutang sa imahe sa flag sa nasud sa France sa akong profile sa Facebook pipila ka oras human sa pag-atake sa mga sakop sa teroristang Islamic State didto sa Paris kaniadtong Sabado.
Isip simpatiya kadto ngadto sa mga nabiktima sa maong insidente nga mikutlo sa subra sa usa ka gatos ka inosente ka kinabuhi, ug miangol sa laing gatusan. Hangtud karon kamulo pang nagbangutan ang mao nga nasud.
Mao kadto ang labing ngilngig nga pagpangatake didto sa France sukad sa Ikaduhang Gubat sa Kalibotan. Lahi nga gubat ang gisagubang karon sa mao nga nasud. Ug kini nga gubat naglangkob sa pagpakigbisog batok sa dakong hulga sa terorismo.
Apan bisan pa man sa mga simpatiya sa pipila dinhi sa nasud, daghan usab ang mibatikos niadtong nag-usab sa ilang mga Facebook profile. Hastang dalia nilang nakapahit namong nagbutang sa bandila sa France.
Matud nila nga dali ra kitang mga Pilipino nakasimpatiya sa mga biktima sa maong pagpangatake didto sa France apan wala kuno nato makita ang dakong inhustisya nga padayong nahitabo didto sa Mindanao.
Kini sama kuno sa padayong harassment sa kasundalohan sa mga lumad didto nga wala gayud masumpo sa kagamhanan ug ang padayong hulga sa presensiya sa New People’s Army sa maong rehiyon ug tibuok nasud.
Adunay ubang nagyawyaw nga nganong ang kalibotan nakatutok lamang didto sa Paris samtang padayon gihapon ang pagpangatake sa mga militanteng IS didto sa Middle East, ilabina sa Iraq ug Syria nga mikutlo na og liboan ka kinabuhi sukad pa sa niaging tuig.
Nakasabot ko sa ilang opinyon. Balido kini ug nga aduna usab silay punto. Apan adunay mga butang nga wala usab nila masabti ngano nga dali nga naka-react ang kalibotan sa dugoong pagpangatake sa IS didto sa France.
Sa akong tan-aw, daling nakasimpatiya ang kalibotan sa France tungod sa ka kalit sa maong panghitabo. Takulahaw lamang nga mibuto ang maong insidente taliwala sa normal nga dagan sa kinabuhi sa katawhan sa usa ka malinawon nga nasud. Angay nato nga huna-hunaon nga nadamay lamang ang maong nasud sa padayong gubot sa Middle East, diin adunay mga teroristang grupo nga nagsabwag sa ilang hiwi nga kawsa ilalum sa relihiyon nga Islam.
Dili gayud nato mabasol ang daling simpatiya sa minilyon sa tibuok kalibotan sa nahitabo didto sa France. Ug wala usab kini nagpasabot nga gipiyong usab nila ang ilang mga mata sa mga masaker didto sa Syria, Iraq ug uban pa.
Ug kabahin sa panghitabo didto sa Mindanao, wala man siguroy Pilipino nga wala mikondena sa mga inhustisya nga nanghitabo didto. Kinsa bay dili gusto og kalinaw didto aron sa ingon makab-ot na nato ang tinuoray’ng kalamboan?