Usa sa mga nakapahimo kang Papa Francisco nga interesante kaayo mao ang pag-angkon nga sama ni bisan kinsang tawo, siya usab masayop. Gani, niangkon siya nga dunay mga tawo nga di niya ganahan ug bation siya og kaislag apan kun ugaling kining maong mga tawo ang mangayo sa iyang panabang o serbisyo iya gihapong ihatag. Kini tungod kay alang kaniya ang tanan kinahanglan man nga iyang alagaran. Sa laing bahin, gipangayo ni Papa Francisco ang pag-ampo ngadto kang San Juan XXIII nga iya untang mahuptan ang kaalam diha sa iyang kasingkasing nga bisan pa man sa iyang kaugalingong kahuyangan ug kakulangan mas mapalabi pa ang kaayo ug kalooy alang sa uban.