Dili tanan motubo buhi

Sulagma lang ang among paghimamatay, nga sa dugay panahon wala na kami magkita. Wala lang damha sa usa ka 'fastfoods' nga kan-anan, nagkaatbang mi sa usa ka lamesa. Samtang nagpaabot sa among mga 'order', nagtimbayaay mi'g nagkahinabiay mahitungod sa among kaugalingon.

Hangtud, nagkahinumdoma'y kami nga managkauban sa kurso sa kolehiyo. Nagkasuod mi kaniadto sa ROTC, nga siya diay nitapon og kurso sa kompyuter. Segun sa pamarug nga ako'ng nakita niya, mora'g miasenso sa kinabuhi. Wa kaayo mi nagdugay human namo'g pangaon, kay may dinalian pa siya'ng mga transaksyones, apan nagbaloay mi'g mga numero sa selpon.

Ang ako'ng isip nahasol sa kalibog, kay matud niya, usa siya ka moderno'ng OFW, nga wala gayud kasulay pagbiyahe sa uba'ng kanasuran, diin daghan siya’g mga koneksyons. Anaa ra kuno siya sa balay nagtrabaho. Di siya kaako mahilayo kaniya ang mga minahal sa kinabuhi. Apan kontento siya kay nagdawat man sab siya'g daku'ng suweldo, sama sa OFW nga nagtrabaho sa gawas sa atong nasud.

Natubag gyud ang nagdibal kong kaisipan, nga diha'y okasyon gidapit ko's  panimalay niya. Didto akong nasaksihan ang mala-mansyon niya'ng balay. Puno og kompleto sa kahimanan, ilabi na didto sa dakung lawak-buhatan o opis may dagha'ng kahimanan sa komunikasyon. Niya pa, diha siya magtrabaho isip usa ka online-OFW. Magdawatan siya’g suweldo, bisag unsa'ng adlawa sa kadagha'ng kompaniya nga iyang giserbisyohan, bisan pamilya nakatrabaho sab sama niya.

Way gipili ang mao'ng klase sa trabaho, bisag ako kuno pwede mag-OFW pinaagi sa online isip 'creative writers' o 'translators. Sa mga nangindahay mo-abrod, mas maayo'ng mag-online-OFW. Naa'y dagha'ng oportunidad, sulaye sa pag-aplay sa oDesk.com, LiveWork.com, Guru.com, Elanse.com,ug Freelancer.ph