EDITORYAL – Sayop nga lakang

Imbes ipahunong ni Mayor Michael Rama ang paggamit og butane canisters nga gitawag na karon og LPG budget stoves, angay nga pangitaan lang unta kini og paagi aron luwas nga gamiton.

Sigurado nga ang kaliboan ka kabus nga pamilya nga migamit karon og LPG budget stoves mangasuko sa mayor kun kampanyahan niya ug did-an na ang pagbaligya sa gitawag sa uban og butane canisters nga gihugopan na pag-ayo sa mga kabus nga pamilya.

Dili tukma nga abi kay adunay mga LPG budget stoves nga migamit og brand nga Type-O, ang laing ngalan sa politikanhong grupo nga kontra ni Mayor Rama, iya na lang ipahunong ang paggamit sa gitawag og butane canisters.

Ang matag lata sa butane canister mapalit ra og P12 sa menudo, P10 kun anha palita sa himoanan, molungtad kini og duha ka adlaw ang paggamit.

Klaro kaayo nga bentaha kini kay sa mogamit og kahoy nga igsusugnod nga tag P20 pa ang kantidad sa kada bugkos. Kini ang rason nga ang mga kabus mibiya na sa paggamit niini sa ilang pagluto.

Dili usab angay nga himoong rason ni Mayor Rama nga idili na ang Butane/LPG stoves sa paggamit tungod lang kay adunay aksidente nga nahitabo.

Bisan ang regular nga gidak-on sa tangke sa LPG aduna ‘say mga aksidente nga nakamugna usab og sunog ug may miulbo nga nakakalas og daghang kinabuhi.

Kun ingon niini ang rason sa mayor, wala na unta ang LPG ug bisan na ang pusporo ug kandila pagka karon, kay daghan man nga sunog nga mugna sa kandila ug sa sayop nga paggamit sa pusporo.