Bato nga kasingkasing

Laing kaso na usab sa subrang pagpasagad nga naglambigit sa doktor sa pampubliko nga tambalanan nga misangpot gyud sa kamatayon sa usa ka bata didto sa lungsod sa Minglanilla.

Matud pa nga wala atimana sa doktor ug uban nga staff sa Minglanilla District Hospital ang masuso nga  pasyente kay walay available nga tambal.

Giresitahan sila sa doktor apan kulang ang kuwarta nga ipalit og tambal hinungdan nga mihangyo unta sila aron lang gyud maluwas ang kinabuhi sa anghel, apan inay kaluy-on giabog na hinoon sila paggawas.

Adunay naluoy sa kahimtang sa bata nga maoy miabaga sa bayranan sa tambal, apan nakawang lang ang tanan kay ulahi na ug namatay gyud ang pasyente.

Kun unta sa sinugdanan pa lang gipangitaan na sa doktor og pamaagi nga maluwas ang pasyente, hayan buhi pa unta ang bata nga anak og pobre nga pamilya.

Dili na mosang-at og reklamo ang ginikanan kay matud pa nga wala sila’y ikasarang pagsukol ug ihangad na lang nila sa langit ang nahitabo.

Makaingon ko nga husto ra tingali ang hukom sa pamilya sanglit daghan na man nga mga kaso sa medical malpractice nga naglambigit sa mga tambalanan apan walay gipadulngan.

Kun kahinumdoman, ingon usab niini ang reklamo kaniadto kalabot sa bata nga namatay sa St. Anthony Mother and Child Hospital human nagsuka kalibang, apan wala matarong pag-atiman. Ang Department of Health (DOH) kutob lang sa pakisusi apan sa himan-himan, walay hustisya nga nahatag sa biktima.

Subo palandungon nga adunay kinabuhi nga nakalas tungod lang sa  mga tawo nga adunay bato nga kasingkasing nga dili makamao mobati og kaluoy sa mga kabus nga nanginahanglan og tabang.

Samtang karon kay election season na man, gisakyan na usab og politiko kining isyuha. Tingali oki ra kun mapolitika kun magbunga kini og maayo nga serbisyo ilabi na sa mga pampubliko nga tambalanan nga mao ra ang madalidali nga kadangpan sa mga kabus nga katawhan.