Minyo nakigrelasyon sab og laing minyo

Dear Atty. Divine:

Duna mi silingan nga minyo apan masakiton ang bana human na-stroke. Kining iyang asawa batan-on pa ug  amo siyang makit-an nga magsakay sakay sa motor  sa lain namong silingan nga minyo sab apan tua sa abroad ang asawa. Usahay among makita nga manglakaw ang duha nga sweet kaayo ug bastusan mi magtan-aw kay nasayod baya mi nga pulos silang duha minyo. Para nako dili maayong ehemplo sa mga batan-on sa among lugar kining duha busa gusto unta namo nga mahunong ning ilang gibuhat. Mamahimo ba namo silang ikiha? Unsa nga kaso ang pwede namong ipasaka? Daghang salamat. — Lina

Dear Lina,

Kun dunay ebidensiya nga kining duha dunay relasyon mamahimo silang mapasakaan og kasong adultery sa habig sa babaye or concubinage sa habig sa lalaki. Apan kamong mga silingan dili mahimong maoy magsilbing reklamante  niini kun dili ang bana ra sa babaye or ang asawa sa lalaki mao ray makapasaka sa maong kaso basi sa nalatid sa atong balaod. Mamahimong mabilanggo ang duha kun mapamatud-an kay criminal case  man kining maong mga kaso. Ang maayo ninyong buhaton mao ang pagsulti  sa bana or asawa sa unsay gibuhat sa ilang kapikas aron sila na ang modesisyon sa pagpasaka kanila og kaso aron maputol  ang ilang mga binuang kun ugaling adunay kamatuoran ang inyong pagduda batok sa duha. Thanks and God bless. — Atty. Divine

Alang sa inyong pangutana may kalabutan sa problemang legal, ipadala lang sa Legal Corner sa Banat News sa V. Gullas St., Cebu City or email sa flores_divina @yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.