Pagmahay ra gyud ang mahimo niadtong mga pamilya nga nabiktima sa bagyong Yolanda kang kansang panimalay naguba apan wala gayud katabangi aron makapabarug pagbalik og balay.
Igo ra sila sa pagpanglingo-lingo nga ang ilang mga ngalan wala giapil sa hatagan og tabang aron unta makatukod sila pagbalik og balay, bisan sa yano lang unta nga kagamitan sama sa ginabas nga lubi.
Hapit na sila kahutdi og paglaum nga ang kagamhanan, ingon man mga Non-Government Organizations (NGO), motabang pa kanila aron makabaton sila og kapuy-an. Kun sila ra ang saligan, dili gayud sila makapatukod dayon og panimalay. Sama ni Titing Ugsimar sa Lambusan, San Remigo, Cebu nag-antos pa hangtod karon sa pagpuyo sa daw “pala-pala” nga maoy gibilin ni Yolanda sa iyang panimalay.
Daghan pa ang sama kang Titing nga nanginabuhi lang pagka mag-uuma ug dili pa makaabot sa pagpatukod pagbalik og panimalay. Sila nagpaabot pa og tabang sa kagamhanan.
Unta ang kagamhanan dili mohunong sa pagtabang niadtong mga pamilya nga wala pa nila kahatagi og tabang aron dili sila magmahay ug magtuo nga ang gobiyerno adunay pinalabi.
Dili unta pilion lang sa mga opisyal kun kinsa kadtong ilang mga suod ug maoy pahatagan og tabang. Kinahanglan nga patas ang ilang pagtagad.
Daghan gyud ang nagbagulbol sa dili patas nga paghatag og tabang kay dunay mga pamilya nga kabahin lang sa panimalay ang naguba sa bagyo apan P30 mil ang nadawat, apan gamay ra ang gihatag ug daghan pa gyud ang wala mahatagi.