Grace-Chiz camp nag-away-away na?

Ang kampo ni Konsehal Lolypop Ouano-Dizon padayon nga misandig kang Ingko Pedong Ouano. Bisan sa pagtaliwan niya usa ka tuig na ang nakalabay, siya ang gihimong inspirasyon ni Lolypop ug sa iyang mga tawo sa ilang kawsa paingon sa 2016.

Gipasabot gani sa konsehal diha sa Facebook nga ang iyang pagsang-at sa sertipiko de kandidatura niatong Oktubre 14 tangkod alas 8:30 sa buntag, gitumong sa adlaw ug oras kanus-a natawo si Ingko Pedong. Si Ingko Pedong giila nga “political kingpin” sa Sugbo. Sa iyang panahon, daghang politiko gikan sa kauluhan ang moyukbo kaniya kun moduaw sa Sugbo.

Miserbisyo isip mayor sa Mandaue sukad 1989 hangtod 1998, hangtod mipuli ang iyang anak nga si Teddy Ouano isip mayor ug karon bokal sa siksto distrito. Tungod niya, ang apilyedong Ouano nakagamot sa masa. Gisaulog niadtong Nobiyembre 7 ang unang anibersaryo sa pagtaliwan ni Ingko Pedong.

* * *

Niadtong miaging semana atol sa interbyu sa media, si Senador Grace Poe nagkanayon nga andam biyaan sa iyang bana ang iyang pagka-American citizen kun modaog siya pagka-presidente.

Taym pa ra gud, biyaan lang ang American citizenship kun modaog si Grace? Pananglit mapilde? Pastilan baya, timailhan kini nga wala gyud diay gugma sa Pilipinas ang pamilya ni Grace.

Kay dili sila makaako pagbiya sa Amerika kun wala’y klaro ang ilang politikanhong kinabuhi dinhi sa Pilipinas. Sa laktod, paniguro ug sineguro kining kang Grace. Akong higalang reporter sa Manila mitug-an kanako nga aduna nay “away-away” nga nanghitabo karon sa kampo ni Grace Poe ug Chiz Escudero kay matud pa tanang minilyon nga kontribusyon sa mga negosyante tua mapunta ni Chiz.

Maayo kaayo nga nakatambag si Chiz kang Grace sa dili pagkuyog kang Mar Roxas kay wala kini maiya sa mga campaign funds.

Apan karon nga sila na ang nagkuyog, si Grace ang alkanse kay ang campaign funds gilumloman ni Chiz. Sa ato pa, wala magsilbe ang pagka-segurista ni Grace kay gigamit ra diay siya ni Chiz.

* * *

Patilawon pa kaha og ikaduha nga termino sa mga Talisaynon si Mayor Johnny Delos Reyes taliwala sa mga kontrobersiya nga giatubang sa iyang administrasyon?

Dili makamahay si Delos Reyes kun yam-iran na siya sa mga Talisaynon tungod sa pagbuhat niyang “family business” sa Talisay City Hall diin anaa ang iyang pamilyang taga-Mindanao ug pastor magyampungad, nagkobra og suweldo, samtang daghang Talisaynon wala gyud makatrabaho sa siyudad. Samtang dul-an sa 100 ka job order ang iyang gi-hire sa Mayor’s Office, ang iyang mga kauban sa LP, lakip na ang iyang Bise Mayor nga si Atty. Romeo Villarante gihikawan og J.O.

Mao kini ang natan-aw sa Liberal Party nga kapakyas ni Delos Reyes paghiusa sa iyang mga kauban sa LP, kay naneguro lang siya og iya.