Nagmalinawon ang atong pag-obserbar sa Kalag-Kalag ug walay natala nga dagko’ng alarma sa sunog nga gitubag ang atong kabomberohan atol nga kita nagpanon ngadto sa mga menteryo.
Ang subsob nga kampanya sa atong kabomberohan sa Oplan Kaluluwa, adunay positibo nga resulta. Kini gumikan usab sa kataas na sa kahibalo sa publiko kabahin sa fire safety.
Gipangandaman na karon sa Bureau of Fire Protection (BFP) Region- 7 ang nagsingabot nga pagsaulog sa labing engrande nga selebrasyon sa tibuok tuig -- ang Pasko.
Sa makausa pa, akong ipaambit sa publiko ang mga mahinungdanon kaayo nga tips aron mahimo nga magmalipayon kita sa pagsaulog sa Pasko.
* * * *
1.) Siguradohon nato nga ang mga series lights nga atong gigamit sa panimalay aprobado sa Department of Trade and Industry (DTI).
2.) Kinahanglan nga palongon ang atong mga series lights kun kita matulog na.
3.) Ayaw pagbutang og series lights sa mga Christmas tree nga ginama sa metal kay posible nga malatayan kini sa kuryente.
4.) Isiguro nga dili maabot sa mga bata ang mga saksakanan kon outlets sa series lights.
5.) Ayaw pagbutang og kandila duol sa Christmas tree kay delikado kini nga masunog.
6.) Ilayo sa series lights ug sa mga outlets ang mga butang nga daling masunog sama sa kurtina, papel ug carpet. Mas maayo nga ang paliton nato nga series lights kadtong ginama sa LED kay dili man init ug dili makasunog.
7.) Ayaw gyud kamo pag-overload og mga appliances sa mga outlets ug mga extension wires kay posible kini nga moinit ug makamugna og sunog.
Pipila lang kini ka pahimangno nga kun inyong hatagan og igong pagtagad, mahimong hapsay ug layo sa sunog ang atong pagsugat sa Pasko.