Tubig ni Konsehal Carillo

Gipistahan karon sa social media ang isyu kabahin sa tubig nga gipanghatag ni Konsehal Gerry Carillo sa mga barangay nga nahimutang sa south district nga napunta sa mga menteryo niadtong Domingo.

Ang tubig nga gipanghatag adunay marka sa pangalan sa konsehal ug gikan usab kini sa negosyo nga iyang gipanag-iya.

Wa ko makasabot ngano nga nakapaguliyang sa katawhan sa dakbayan sa Sugbo ang tubig nga gipanghatag sa konsehal niadtong mga gipang-uhaw.

Tungod ba kay ang botelya nga gisudlan sa tubig adunay marka sa pangalan sa konsehal? Kun pananglitan si Gerry Auxilio ang manghatag og tubig unya ang botelya nga gisudlan sa tubig nga iyang gipanghatag may marka sab sa iyang pangalan, masaba pud kaha ang katawhan diha sa social media?

Labing seguro, mingaw pa sa menteryo ang mahitabo ug wala gyuy social media nga motuki sa pagpanghatag nako og tubig.

Unsa may kalainan sa tubig nga gipanghatag ni Gerry Carillo niadtong Domingo ug sa tubig nga ipanghatag pananglitan ni Gerry Auxilio?

Ato ba nga ingnon nga adunay kalainan tungod kay si Carillo kandidato ug si Auxilio dili? Kining tanan bunga ug mugna lang g’yud sa kainit karon sa politika sa dakbayan sa Sugbo.

Ka faets ning politika.