EDITORYAL – Unsa'y gikahadlokan?

Gipahibalo ni Mayor Michael Rama nga dili niya tugotan ang mga department head sa Cebu City Hall nga motambong sa gikatakda na nga Executive Session sa City Council karong Nobiyembre 12.

Gitumong sa mao nga kalihukan aron mahisgotan ug kapangitaan og sulbad ang problema kabahin sa giingong kakuwang og pundo nga salapi sa paghipos sa mga basura dinhi sa dakbayan sa Sugbo.

Apil gani nga gidapit sa konseho si Mayor Rama aron makapasabot sa iyang baruganan kabahin sa mao nga isyu ug ang city treasurer, ang budget officer, ang city accountant ug ang hepe sa Department of Public Services (DPS) makahatag og inpormasyon sa mga konsehal.

Walay mawala ni Mayor Rama kun patambongon ra niya ang mga department head ug makapanubag sa pangutana sa mga sakop sa konseho.

Sigurado gyud hinuon nga apil sa ipangutana sa mga konsehal ngadto sa mga department heads kun tinuod ba nga nahurot na paggasto sa dakbayan ang P101 milyones nga napagahin na sa City Council alang sa gastohan sa paghipos sa mga basura.

Sa Annual Budget ang konseho mipagahin og P51 milyones alang sa garbage tipping fee. Kay nahurot na kuno pagka Hunyo, giaprobahan na usab sa konseho nga mogamit ang dakbayan og dugang P50 milyones gikan sa Calamity Funds.

Kun walay gikahadlokan si Mayor Rama nga mabutyag atol sa Executive Session, dili niya hikawan ang mga konsehal nga magkahinabi ug ang mga department heads nga direktang ubos sa iyang pagdumala.

Alang sa mga konsehal, kun masuta nila nga nahurot na gyud ang P101 milyones sa paggasto, angay usab nga motabang sila nga kagahinan og laing pundo alang sa paghipos sa atong mga basura.