Wa pa kadawat si Lapu-Lapu City Mayor Paz Radaza sa tulo ka buwan nga suspension order nga gipahamtang sa Sandiganbayan batok niya apan may andam na siyang mga tubag: Di silot ang suspenso kay wa pa siya mapamatud-ing sad-an ug way sukaranan ang preventive suspension kay di na siya opisyal sa Girl Scouts of the Philippines Cebu Council, nga maoy orihinal nga gihatagan sa pork barrel ni kanhi kongresista Clavel Asas-Martinez, ug way labot ang kaso sa iyang pagka mayor. Apan wa maapil sa tubag ni Radaza ang kinaham nga panagang sa ubang mga opisyal nga gikiha ug gipangsuspenso sa puwesto: Politikanhong pagpanggukod.
* * *
Kay sa kakugang sa mga Sugbuanon, nga nakasaksi unsa sila kasuod sa pamunoan ni kanhi presidente Gloria Macapagal-Arroyo, wa lang siya dawata sa Liberal Party (LP) mao pa g’yuy giproklamar nga opisyal nga piliunon sa administrasyon, sinalikway ang negosyanteng si Jun Pelaez, nga mao ray LP nga nagtikaw-tikaw sa Opon dihang wa pa kabanos sa Malakanyang si Presidente Noynoy Aquino. Maong pagkadungog sa hukom sa Sandiganbayan gipalabi ni Pelaez ang pag-pekat sa kadagkoan sa LP inay sa pagpahinumdom sa katawhan nga ang labing uwahing kalamboan nidason sa dugay, kutas ug lisod niyang kampanya batok sa gitumbok niya nga lapad nga pangurakot sa Opon ubos sa pagduma sa mga Radaza.
* * *
Sama og kahimtang ni Radaza sa laing haligi sa LP sa Sugbo nga si Consolacion Mayor Nene Alegado. kansang bana nga si Nilo gikiha og tax evasion. Matu’d ni BIR Commissioner Kim Henares wa mobayad si Nilo og P102.94 milyones nga buhis sa iyang importasyon sa bugas niadtong 2009. Wa hinuoy kalamboan sa kaso bisan gipasaka niadto pang 2011.
Di sang katiyabaw og pamolitika ang mga Martinez sa pagkasuspenso dungan ni Radaza ni Cebu Provincial Board Member Tining Martinez, kay si Bogo City Mayor Junnie Martinez ang lider sa LP sa ikaupat nga distrito, gani maoy opisyal nga kandidato sa administrasyon batok ni Kongresista Benhur Salimbangon sa 2016.
* * *
Bisan sa pagkasuspenso og dayon ni Makati City Mayor Junjun Binay sa katungdanan, di nang kapasangil og pamolitika ang oposisyon kay sunudsunod man sang gitaktak ni Ombudsman Conchita Carpio-Morales ang mga suod ni Presidente Aquino nga gobernador sa Capiz, Victor Tanco Sr., ug mga heneral sa kapolisan nga silang Alan Purisima ug Raul Petrasanta.
Samtang nihangop sa kaisog sa Ombudsman, ang mga magbubuhis niawhag nga lihukon sab ang ubang mga kasong pagpangawkaw ug pahamtangan sa mas bug-at nga silot ang mga nasuspenso ug nataktak sa puwesto. Nanguha si Morales og dugang batan-on ug banggiitang mga abogado pagsulbad sa kanihit sa graft investigators sa Ombudsman. Hapit na bang adlaw sa panudya sa mga kawatan sa gobiyerno?
* * *