Bag-ohay pa lang, nga gipapahuway sa kahitas-an si Sir Nitz Jabat, ang 'publisher' sa Banat News, diin di lalim ang tuma'ng sakripisyo niya'ng gipuhonan. Sa pagkahibalo ko's balita, ingon sa midat-og kanako ang tuma'ng kasubo ug kamingaw, kay di ko na siya masud-ong, mahikap ug madungog ang pagdasig.
Tipik na sa ako'ng kinabuhi si Sir Nitz. Kabahin sa panulat, siya'y nihimog giya sa angay kong buhaton. Iyang ideya kining "HIMSOG NGA KASAYURAN''. Wa ko'y kaisog niadto sa pagdawat sa tahas. Kay wa ko'y kasinatian sa ingon ini, ug di ko tadhan sa pagsulat. Wa sa dugo ko ang pagkamagsusulat, apan daghan ko'g kasinatian mahitungod sa tawo, ug mga kalamboan. Niya pa, mao'y isulat.
Wa ko malimot sa pagdasig ni Sir Nitz kanako, nipasumbingay siya nga "Ang butang aron mohait, kanunay kini bairon." Nidugang pa siya, "Apan matngoni nga dili ka makasamad og balatian." Ingon sa nahitiurok ko sa kahimatngon. Matud niya, "makahimo ka, kun may gugma ka sa pagkat-on. Wa pa lang nimo madiskubre, asa ikaw mohaom, nga ikapagawas ang imong katakos."
Nabatyagan ko ang kamatinud-anon sa iyang pagkatawo, kay bisa'g nakita nako nga luya pa ang iya'ng lawas, gidalit gihapon kanako, ang tam-is niya'ng pahiyum. Giila ko niyang bililhong tawo nga may paglaum, bisan luyo sa akong pagkauyamot. Gibinlan ko niya'g binhi, aron pabungahon og mga kasayuran, nga himsog usab kining kapahimuslan, ang mithi sa mga maayong pagpakabuhi.
"Sir Nitz, buhi ka gihapon sa among mga kasingkasing, nga hangtud karon padayon nagtuon sa akong pagsulat. Ania pa ko sa ang-ang sa kaisog sa pagkat-on, apan di ko ikaw pakyason. Kay buhaton ko ang kutob sa masarangan, nga masundog ang katalagsaon sa imong pagkatawo. Kanus-a man ako, nga hingpit kanimo makasunod, isalig ko la's kahitas-an, ang panahon sa iyang kabubut-on."