Ang BFP andam na

Nangandam na ang kabomberohan alang sa pag-obserbar nato sa adlaw sa mga santos ug adlaw sa mga kalag karong Nobiyembre 1 ug 2.

Kini pinaagi sa paglusad og Oplan Kaluluwa 2015 nga nagdala sa tema nga "Iwas sunog sa panahon sa undas."

Mopakatap kami og mga flyers ug posters aron pagpahinumdom sa katawhan nga dili magpabaya kun biyaan nila ang ilang kabalayan kay mopauli sila sa probinsya.

Mao kini ang panahon nga mobiyahe g’yud kita aron duawon ang lubnganan sa atong mga mahal sa kinabuhi.

Sa atong pagbiya sa panimalay kinahanglan nga isiguro nga wala’y biyaan nga kandila nga magsiga. Kasagaran, mao g’yud kini ang hinungdan sa sunog.

* * *

Isiguro pagsirado ang regulator sa gas stove sa dili pa kita mobiya. Labing maayo og atong susihon daan ang LPG hose ug regulator kun wala ba kini buslot, aron mailisan kun duna man gani.

Kinahanglan nga sa dili pa kita mobiya sa panimalay isiguro g’yud nga wala’y dekuryente nga appliances nga nakasaksak pa sa outlet.

Mas maayo og i-off g’yud ang circuit breaker aron hingpit nga luwas kita sa sunog. Importante kaayo kini, ilabi na sa mga nigamit og electric stove unya naabtan og kalit nga brownout kay sagad nga dili nato ma-off ang stove.

Kun atong mapalong ang plangka, sigurado g’yud kita nga wala na’y supply sa kuryente. Ato pud nga likayan ang octopus connection nga maoy numero uno nga hinungdan sa sunog.

Kun may ikabilin sa panimalay, mas labing maayo aron may makabantay kun dunay mga kasikas nga mahitabo. Sa inyong pagbiyahe, isiguro usab nga kondisyon ang inyong mga sakyanan aron makalikay kamo sa kakulian diha sa kadalanan.

Kinahanglan nga i- check ang BLOWBAG, kon Battery, Lights, Oil , Water, Brakes, Air ug Gas.

Ang inyong kabomberohan manghinaot nga unta magmalinawon ug hapsay ang atong pagtimaan sa Kalag-kalag 2015.