Sulod sa 18 ka tuig, nahimo na nakong amahan sulod sa newsroom si Sir Juanito V. Jabat, ang among publisher sa Banat News ug kanhi publisher ug editor-in-chief sa The Freeman. Tungod kay sayon lamang siya nga duolon, barkada sa tanan si Sir Jabat.
Gani sa una namong panagkita, mora kaming suod nga higala nga dugay nga wala magkita. Sukad niadto, kining inyong higala nga probinsiyanong journalist gikan sa Zamboanga del Sur miisip ni Sir Jabat dili lamang usa ka higala kun dili usa usab ka amahan.
Napadpad ko sa Sugbo kaniadtong dekada nobiyenta isip deskman sa The Freeman Mindanao (TFM), ang sister publication kaniadto sa The Freeman dinhi sa Cebu. Tungod kay ania sa Sugbo ang central desk sa TFM, updated usab ako sa mga panghitabo dinhi.
Tungod niini, wala nagpanagana si Sir Jabat pagkuha kanako isip contributing editor sa Banat News, diin siya ang editor-in-chief kaniadto. Mao nang nahimo kong backup ni associate editor John Rey Saavedra.
Siya usab ang nag-encourage kanako pagsulat og kolum sa Banat News. Ug kaluoy sa kahitas-an, mokabat na usab sa 18 ka tuig kining inyong paboritong Saksak Sinagol.
Tungod sa ka suod ni Sir Jabat ug sa mga empleyado sa The Freeman, kanunay siya’ng kuhaon nga ninong sa kasal. Usa na ako sa iyang linudhan. Apan tungod sa ka layo sa isla sa Camotes ug sa ka dautan sa panahon, wala makaadto si Sir Jabat. Bisan pa man niini, wala niya gipatangtang ang iyang ngalan isip usa sa mga sponsor sa akong kasal kaniadtong 2006.
Ang akong dili hikalimtan mao ang iyang hilig nga mokomedya, ilabina kun kami lamang duha. Basta siya na gani ang mopasiaw, dali ra kaayo kong mokatawa. Hinuon makita kanang iyang pagka-komedyante sa iyang popular na kaayo nga lindog sa The Freeman.
Dihay usa ka higayon samtang diha ko sulod sa iyang opisina usa kadto ka buntag, puwerte nako nakabahakhak sa iyang mga komedya. Ang kusog nakong katawa milapos diay sa dingding sa iyang kwarto ngadto na sa kinatibuk-an sa newsroom.
Mao nang paggawas nako sa iyang opisina, nahugyaw ang tanan kay nagkatawa usab diay sila naminaw sa akong mga agik-ik.
Karon mitaliwan na ang among amahan sa newsroom. Bisan pa man niini, dili ko ka-imagine magsud-ong sa ka alegre sa hawanan didto sa kahitas-an niining iyang pagbayaw.
Niining imong pagpanaw Sir Jabat, dako akong pasalamat sa dakong pagsalig ug oportunidad nga imong gihatag kanako. O milambo ang akong propesyon. Apan dako kini nakong utang kabubot-on kanimo.