EDITORYAL - Kompiyansa na sad

Daghang nakalas sa pag-igo sa bagyong Lando didto sa Luzon sayo niining semanaha, sagad sa mga biktima gibanlas sa baha ug tataw kaayo nga wala sila makapangandam o ba kaha wala gyud masayod kun unsay ilang buhaton.

Apan unsa may nahitabo karon didto sa Luzon sa pag-igo sa bagyong Lando?

Kapin 50 ka tawo ang namatay, dul-an sa usa ka gatos ang naangol ug kapin usa ka milyon ka tawo ang namakwit gikan sa ilang mga panimalay ug P7 bilyones ang danyos sa agrikultura ug imprastraktura ang danyos.

Nibalik na ba usab sa pagkompiyansa ang atong National Risk Reduction Management Council (NDRRMC) ug Office of the Civil Defense (OCD)?

Tungod ba kaha kay ang gobiyerno na-busy na sa umaabot nga eleksyon. Nakalimot sila sa ilang mga prayoridad?

Hangtud karon wala pa gihapon maleksyon ang gobiyerno kun unsay angayang buhaton kun adunay umaabot nga katalagman.

 Ang NDRRMC ug OCD maoy gitahasan pag-mobilized sa tanang ahensya sa gobiyerno aron mangandam kun dunay umaabot nga katalagman, search and rescue operations ug rehabilitasyon sa mga naapektahang mga lugar.

Human sa pag-igo sa bagyong Yolanda niadtong tuig 2013 diin siete mil ka tawo ang nakalas ug bilyones nga kabtangan ug tanaman ang nangadaot.

Napukaw ang gobiyerno ug nipakita og maayong preparasyon dihang dunay mga nisunod nga mga bagyo maong menus kaayo ang nangamatay ug gibiling danyos.

Hinuon di parehas ang gikusgon sa Lando sa maong nanglabay nga bagyo human sa Yolanda, apan mas mamenusan pa gyud siguro ang naapektahan kun dunay maayong pagpangandam.

Kung pa-pogi points lang unta maoy ilang tuyo, mas maayong ilaha kining gihimo atol sa preparasyon ug dili sa pagpanghatag na lang og mga relief goods ngadto sa mga biktima.