Gusto’ng ipagamit sa papa ang iyang apelyido

Dear Atty. Divine,

Duna ko’y anak nga lalaki sa akong pagka ulitawo. Pagkatawo sa bata wa’ ko dinhi sa Pilipinas hinungdan nga wa’ ko kapirma sa iyang Birth Certificate. Ang apelyido sa mama ang gigamit nga apelyido sa bata. Gusto unta nako nga ipausab ang apelyido sa bata kay hapit na siya moeskwela aron ang akong apelyido ang madala niya. Unsa may akong buhaton? Makababag ba ang inahan sa bata kun ipagamit nako ang akong apelyido sa akong anak? — Ronald

Dear Ronald,

Kun ang bata illegitimate, base sa atong balaod (Article 179, Family Code, as amended by R.A. 9255) kini nagkanayon nga apelyido sa inahan ang iyang gamiton. Apan ang atong balaod nagtugot ‘sab nga gamiton sa bata ang apelyido sa iyang amahan basta gi-recognize siya niini or giangkon siya sa amahan. Ang maong balaod naghatag ‘sab og katungod sa bata nga maoy mo-decide kun kinsa nga apelyido ang iyang gamiton. Buot ipasabot nga dili ka makapugos sa bata sa pagpagamit sa imong apelyido kun dili niya gusto ug dili ‘sab makababag ang iyang inahan kun gusto sa imong anak nga mogamit sa imong apelyido. Ang maayo nimo nga buhaton kay minor pa man ang imong anak, mas maayo nga makigsabot ka sa inahan sa bata nga gusto nimo’ng ipagamit ang imong apelyido sa inyong anak. Kun mosugot siya, then mo-file ka og Affidavit of Acknowledgment or Paternity sa Local Civil Registrar diin marehistro ang imong anak ug ilakip ‘sab nimo sa Affidavit nga gitugotan nimo ang imong anak paggamit sa imong apelyido ug miuyon ang inahan sa bata kalabot niini. Kini aron mausab ang Birth Certificate sa bata ug mabalhin na ang iyang apelyido sa imong apelyido. Thanks and God Bless. - Atty. Divine

Alang sa inyong pangutana may kalabutan ang problema’ng legal, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.