Brgy Mabolo, Cebu City
“Kining gihimo nga demolisyon sa mga manindahay diri sa may APM sa North Reclamation Area pinili ra man kay daghang naninda sa may basketan pero wala man g’yud hilabti. Grabe ang demolisyon kay hasta ang among mga kalan gipangguba.”
Brgy Maribago, Lapu-Lapu City
“Naa mi silingan diri sa may Sitio Datag nga kun mapraning gani magpataka lang pagsunog og bisan unsa nga butang. Kuyawan mi basin balay na unya ang sunogon, sikit ra ba kaayo ang mga balay diri.”
Brgy Dakit, Bogo City
“Tagdon na unta sa mga opisyal ang bati kaayo nga karsada diri sa may Cabangcalan kay dugay na kaayo mi nga nag-antos kay lisod ang pag-agi sa mga sakyanan, ilabi na sa mga motor.”
Brgy San Nicolas Proper, Cebu City
“Kanus-a pa man tawon ni maniga ang mga suga sa poste diri sa C. Padilla ug B. Aranas Streets nga dugay na man kaayo ni namo nga gireklamo sa barangay apan walay aksyon.”
Brgy Apas, Cebu City
“Maayo unta og atimanon na sa mga opisyal ang karsada paingon sa Sitio Plaza kay ang tubig anha na man moagi sa karsada tungod kay ang kanal barado na man kaayo sa mga basura. Kuyaw kaayo sa maglakaw kay ang karsada dangog tungod kay gilumotan tungod sa sige’g kabasa.”
Brgy Lorega-San Miguel, Cebu City
“Hagbay ra kami nga naghangyo nga pailisan ang napunder nga mga suga sa poste diri sa Sitio Laguna apan hangtud karon wala man atimana. Ngitngit na kaayo ang among lugar tungod kay wala man gihapon mailisi ang punder nga bombilya.”
Brgy Jomgao, Argao, Cebu
“Maayo unta og dili magpakabuta-bungol ang among mga opisyal sa barangay sa problema sa sugal diri sa among lugar, ilabi na ning tong-its. Ngil-ad man gud tan-awon nga anha ra kilid sa karsada magsugal bisa’g klaro ning ilegal ug dakponon pero ang mga opisyal ug mga tanod wala g’yuy gihimo nga aksyon.”
Brgy Luz, Cebu City
“Ngano nga ang fire truck sa among barangay anha man iparking sulod sa menteryo, imbes anha unta kilid sa barangay hall kay aron kun may alarma sa sunog magamit dayon. Lisud man gud kun anha sulod sa menteryo kay kun naay sunog manawag pa sa caretaker para ablihan ang gate aron makagawas ang fire truck.”
Brgy Siotes, Tuburan, Cebu
“Naunsa na man ning among kapitan nga panagsa ra man namo makita sa among barangay sukad siya napili. Kun adunay problema sa barangay wala may makahimo’g aksyon kay ang kapitan pangitaonon pa nga unta naa man siyay obligasyon sa mga tawo nga nagpili niya.”
Alang sa inyong mga reklamo text lang sa 09062973166
- Latest
