Madutlan gyud diay. Sukwahi sa pangangkon ni Bise Presidente Jejomar Binay nga di matay-og ang batakan niyang mga dumadapig, bisan sa tanang pasangil sa kahiwian batok niya, nitibugsok ang iyang trust ug popularity ratings sa sunodsunod nga nasudnong surveys sa Social Weather Stations (SWS) ug Pulse Asia. Labing dakong kahadlok karon sa iyang kampo mao nga wa pa motugsad si Binay sa kinaubsang ang-ang.
Kublan lang ang di madutlan sa way kinutoban nga kampanya sa paka-uwaw batok ni Binay ug sa mga sakop sa iyang pamilya. Nabantang nga way anting-anting si Binay. Mas apiki pa gyud ang iyang kahimtang kun may sukaranan ang paglambigit niya sa daghan ug dagko uyamot nga mga eskandalo.
* * *
Human gipugngan sa korte ang binilyon ka pesos niyang bank accounts, si Binay morang depositor nga naglaway sa dagkong numero sa iyang bank accounts apan di siyang katandog sa bisan usa ka dako sa nagbuntaog niyang katigayonan. Sa pikas nga bahin, nagtumpi nang iyang gastohan sa paghingpit sa iyang slate alang sa piniliay sa Mayo 9, 2016.
Gipanghimakak sa kampo ni Binay ang mga huhungihong nga nalangay ang pagkaumol sa Bin-Go tandem kay dugay’ng nagkasabot sa taas nga presyo sa pagtando ni Senador Gringo Honasan. Gisalikway sab nila nga kakuwang sa kuwarta ang hinungdan nga wa pa maumol ang ilang senatorial slate hangtod karon.
* * *
Nitumaw ang mga timaan sa kakuwang sa kuwarta sa labing uwahing pagduaw ni Binay sa Sugbo sa niaging semana. Kasaligang mga tinubdan nagbutyag nga ang tinuod nga hinungdan sa pagpanggawas sa mga nanambong samtang nagdiskurso si Binay di mao ang kainit sa Cebu Coliseum kun dili ang kapakyas sa mga tigpasiugda pagpanghatag sa gisaad nga paniudto.
Samang mga tinubdan nagbutyag nga gidapit ni Binay sa dakong tapok ang tanan niyang alyado sa Sugbo. Apan pulos sila may balibad, may mga kasal, bunyag ug ubang tigom nga gitambongan. Maong si Cebu City Mayor Mike Rama ray nagtikaw-tikaw pag-abi-abi ni Binay.
* * *
Nakapasamot pagduot ni Binay, bisan sa mga mata sa katawhan nga wa magtagad sa politikanhong mga maniobra, ang pagkatangtang sa iyang anak nga si Makati City Mayor Junjun Binay. Dakong buslot sa iyang kampanya ang pagkawagtang sa binilyon ka pesos nga puntil, kaliboan ka kawani ug gatosan ka sakyanan sa Makati City Hall. Ang giandam nga mga kasong kriminal sa Ombudsman batok ni Binay, makadut man o dili, makahukas sa bisan unsa niyang pagpaka-aron-ingnon sa kahawod.
Wa katabang sa iyang kawsa ang panungog ni Senador Antonio Trillanes nga mosibog na si Binay sa iyang kandidatura ug ang tanyag ni Manila Mayor Joseph Estrada pagpuli niya. Human nangangkon daan og kadaogan, nagkaabundang ebidensiya nga si Binay di lang madutlan mahimong mangiwit pa.