Kun suliran sa traffic ang hisgotan, ang Metro Cebu dili na usab kabintahaan nga hapit na mahisama sa Metro Manila.
Dili pa hinoon ingon ka grabe apan sa ngadto-ngadto mao gayud kini ang atong padulngan gumikan sa nagkadaghan nga sakyanan, ilabi na ang private vehicles nga affordable na kaayo ang downpayment ug ang binulan nga bayranan mao nga maingganyo g’yud ang uban.
Kini ang usa sa nakatampo sa paghuot sa trapiko sa Metro Cebu.
Apan kini nga scenario mahimo nga mahatagan na og sulbad sa "My Bus" project sa usa ka dako’ng kompaniya nga hapit na mo-operate dinhi sa Sugbo.
Mokapin sa usa ka bilyon ka pesos ang kinatibuk-an nga proyekto nga naglakip sa 77 ka first class ug hi-tech buses ug ang katukoran sa mga terminal o bus stop nga himoon alang sa mga pasahero.
Makapasakay og 90 ka pasahero ang matag bus. Ang rota niini sa dakbayan sa Talisay, Cebu City, Mandaue City hangtud na sa airport sa dakbayan sa Lapu-Lapu.
Gipaneguro sa management ug sa DOTC mismo nga dili maapektohan ang ubang mga pampubliko nga sakyanan sanglit motadlas man ang rota sa mga karsada nga wala’y biyahe ang mga PUJ.
Tinguha sa proyekto nga mamenosan ang mga private vehicles sanglit mosakay na man ang mga vehicle owners sa mga bus. Apan unsaon na lang kun dili mosakay sa mga bus ang mga tag-iya sa mga pribado nga sakyanan?
Dinhi na motumaw unya ang problema. Usa ka dako’ng hagit karon sa tigpasiugda niining my bus ang pagpasabot una sa mga sumasakay kay imbes mahimo kini nga solusyon, makapasamot na hinoon kini sa problema sa kahuot sa trapiko, ilabi na nga hagip-ot kaayo ang mga karsada sa Metro Cebu area ug dunganan pa sa wala ug tuo nga mga road repair projects ug uban pa nga “ka ek ekan” sa DPWH.