Unsa’y responsibilidad sa tag-iya’s iro

Dear Atty. Divine,

Nag-abang ra mi diri sa Mandaue ug kining among silingan nga nag-abang ra pud nagbuhi og iro unya nanganak. Ang akong bana hapit mapaaki sa iro kay diha man niya gihigot sa agianan paingon sa comfort room. Kuyawan mi nga mapaakan ang mga bata kun moagi padu’ng sa CR. Maka-file ba kami og kaso batok sa among silingan nga nagbuhi og iro kay delikado man nga mapaakan ang mga bata. Unya saba pa g’yud kaayo kay magsige og usig. Gusto unta nako nga mawala na ang iro kay mao g’yud na ang hinungdan sa kasamok diri. — Leonor

Dear Leonor,

Ang Republic Act 9482 kon Anti-Rabies Act of 2007 naglatid nga ang responsibilidad sa nagbuhi og iro mao ang pagpabakuna sa hayop, dayon iparehistro ug kinahanglan nga hiktan g’yud ang iro aron dili makapaak, ilabi na sa mga pampubliko nga lugar ug kun ugaling makapaak kinahanglan nga sila ang mobayad sa galastohan sa napaakan. Ang una nimo nga buhaton karon mao ang pagpasaka og reklamo sa inyong barangay labot sa iyang iro nga naa gibutang sa agianan ug delikado nga makapaak, ilakip sab nimo pagreklamo ang kasaba sa iro ilabi na panahon sa kagabhion. Atol sa inyong panagtagbo sa barangay mahimo ‘sab nimo siya nga pangayoan og proof kun nabakunahan ba ang iyang iro og kun narehistro ba sa City Veterinarian’s Office kay kun wa niya tumana ang balaod mahimo siyang ikiha. Mahimo ‘sab ikaw nga moreklamo sa tag-iya sa inyong giabangan aron imong masuta kun gitugotan ba ang mga nag-abang nga magbuhi og iro.-Atty. Divine

Alang sa inyong mga pangutana may kalabutan sa problema’ng legal, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column.