Dakong eskandalo kining nasudlan karon sa Liberal Party kabahin sa malaw-ay nga video nga nag-viral sa social media diin nagpakita sa pipila ka mga lalaki nga 'enjoy' kaayo sa gibuhat sa mga babaye sa ilang pagsayaw ug niapil pa og 'grind' sa tugtog nga "Twerk it Like Marley."
Matud pa sa nanggawas nga report, surpresang regalo kadto ni MMDA chairman Francis Tolentino kang Rep. Benjamin Agarao, Jr. , apan gihimakak kini ni Tolentino.
Mao ni kadaot sa politika, mahimong makaayo sa imong pagkatawo ang paghisgot lang sa imong pangalan apan mahimo usab nga maoy makaguba niini.
Basin kuno gituyo lang pagsulti ang pangalan ni Tolentino sa emcee aron lang "mailhan" kay lagi gusto man diay niining modagan pagka-senador.
Sa usa ka politiko, kun mahisgotan gani ang imong pangalan dugang 'mileage' na kini alang kanila. Matud pa lagi, 'bad publicity is still publicity.' Apan ang epekto niini ang tibuok LP ilabi na ang ilang standard bearer nga si Mar Roxas karon maoy gisaway sa mga netizens.
Gitawag karon ang maong eskandalo nga "Tuwad na Daan" inay nga "Tuwid na Daan" nga nalahi na og kahulogan. Si Roxas nangangkon nga human na ang iyang papel nga mao ang pagpapanumpa sa mga bag-ong sakop sa LP dihang nag- twerking ang maong mga dancers.
Matud niya wala na siya makakita niadto, mahimong tinuod ug mahimo sang dili, apan ang klaro wa man sa video si Roxas. Apan dili man ingon niini ang pagtan-aw sa mga nakakita sa video ilabi na sa mga kritiko sa LP.
Kutas ug lisod kaayo ang pagpasaka sa ratings ni Roxas nga karon ikaduha na sa Pulse Asia Survey sunod kang Sen. Grace Poe. Apan tungod sa maong eskandalo posibleng maapektahan na usab ang iyang ratings niini.
Usa kini ka leksyon nga angay nilang bantayan ilabi na karong nagsige pa og kombate sa rating game ang mga kandidato.