EDITORYAL - Makahadlok nga kinaiya sa botante

Daghang nag-ilog niining gitawag nga “underdog” sa mga kandidato  pagkapresidente sa nasud karon. Daw ilang gisudlan ang nag-unang ‘weakness’ sa mga botante nga magpadala sa emosyon.

Apan nabasa na ba gyud kaha sa mga kandidato ug sa ilang mga campaign managers ang kinaiya sa mga botanteng Pilipino?

Usa sa kinaiya sa mga Pilipino ang pagkamanggiluluy-on ug molaban niadtong mga dinaog-daog. Busa, kung si kinsa sa mga presidential aspirants nga mogawas nga dinaog-daog makapaabot gyud og “sympathy votes” gikan sa katawhan.

Laing kinaiya nga angay usab timan-an mao ang pagkamadinumtanon sa mga Pilipino apan sa samang higayon, salikwaot usab kay duna say dali kaayo nga makalimot. Maugtas gyud ang usa ka kandidato kun adunay daghang bati nga isyung manggawas bahin kaniya kun hapit na ang eleksyon kay kining mga madinumtanong botante dili raba motan-aw kun tinuod o dili ang mga pasangil.

Motuo dayon sa mga tabi-tabi apan tapolan manukiduki pagsubay kun tinuod ba ang maong mga balita bahin sa usa ka kandidato.

Ang uban kanila motuo bisan sa mga “memes” sa mga social networking sites nga pangdaot o pangilad sa mga kandidato, ug manakod pa gyud sa uban kay ila man pud i-share  sa uban.

Ang makahadlok niini, daghang mga botanteng ingon niini, wa pay labot sa mga botanteng “for sale” ang boto. Apan ang bili sa ilang boto sama ra og ihap sa boto sa mga gitawag og “educated and informed voters.”

Dinhing dapita magamit ang Simbahan, ang mga educators,  ang media ug uban pang sektor nga  naglantaw sa kaugmaon sa nasud.

Kinahanglang kadaghanon ka pilo ang ilang buhatong pag-edukar sa mga botante  aron di mausik ang botos ngadto sa mga way pulos mga mamahimong lider sa nasud.