Auditors apil sa binuang?

Angay g’yud nga imbestigahon sa Commission on Audit (COA) ang mga state auditors nga gipasanginlang nalambigit sa P500 milyones nga Priority Development Assistance Fund (PDAF) nga alokasyon ngadto sa 20 ka kanhi ug kasamtangan nga mga magbabalaod.

Si Atty. Levito Baligod maoy una nga mi-expose niini nga  mga state auditors sa COA nga apil sa kontrobersiyal nga pagmaniubra nga ang pundo sa gobiyerno mahipunta sa mga peke nga non-government organizations (NGOs) nga gidumala ni Janet Lim-Napoles.

Bati paminawon ang pamahayag ni COA Commissioner Heidi Mendoza nga magpaabot usa siya kun may kaso nga masang-at bahin niini usa siya mohimo’g imbestigasyon sa pasangil ni Atty. Baligod.

Una nga gipasanginlan ni Atty. Baligod nga apil sa binuang sa pork barrel mao sila si kanhi state auditors Juanito Espino Jr., Tito Nabua, Carmelita Sanchez ug Herminia Aquino.

Angay nga sugdan na ni Mendoza ang paghimo’g imbestigasyon ug kun may ebidensiya nga makit-an, angay siya nga maoy mangulo sa pagpasaka og kaso batok sa mga state auditors nga giingon nga kunsabo sa mga magbabalaod nga nangurakot sa kuwarta sa katawhan.

Unta mahuna-huna ni Mendoza nga makatabang sa nasud kun imbestigahon, ilhon ug iyang pasilotan ang mga state auditors nga kakunsabo sa binuang, ilabi na kadtong nadestino sa mga probinsiya sa Kabisay-an ug Mindanao.

* * *

Naghisgot na man g’yud ta og PDAF, ngano man diay tuod nga dili man dayon makahatag si Kongresista Luigi Quisumbing og kuwentada kun giunsa niya paggasto ang P210 milyones niya nga PDAF?

Maminaw man gud ko sa mga kumentaryo sa radyo ug kanunay siya nga gimakmak sa pagsaway kay wala g’yud kuno motubag kun giunsa niya sa paggamit ang iyang pork barrel.

Husto bitaw, ngano nga dili man makahatag si Luigi sa kuwentada kun giunsa paggasto ang iyang PDAF aron pagwagtang sa pagduda nga kini nawari-wari lang.

Diha man gud diay report sa COA nga ang P3 milyones nga PDAF ni Luigi mura’g didto mahatag sa usa ka bogus nga NGO. Pastilan, kun tinuod man ang report sa COA, dili g’yud kini maayo.

Sa akong nahibaw-an, ang mga kongresista nga maoy gigahinan sa PDAF maoy moila kun unsa nga NGO o kaha ahensya sa kagamhanan ang tugyanan sa paghimo sa proyekto nga gusto nila nga ipatuman.

Awhag nako ni Luigi nga kinahanglan nga limpyohan niya ang iyang kadungganan kay nagtinguha ra ba siya nga modagan isip amahan sa usa ka dakbayan.