Mura’g magkapuliki g’yud og panagang si Senador Grace Poe sa ataki gikan sa mga kaatbang niya nga kandidato pagka presidente.
Giatake karon pag-ayo sa mga kontra sa politika ni Grace Poe mao ang iyang pagka US Citizen. Usa ka hukom sa Korte Suprema maoy ilang gamiton aron mopabor kanila ang taas nga hukmanan.
Mura’g tan-aw nako, susama ra ba og dagan sa kaso. Sa mao nga kaso, pilde ang gireklamo nga mayor didto sa Mindanao. Angay kini nga tan-awon pag-ayo kay basin kadtong gusto nga mobotar ni Grace Poe mag-usik-usik lang sa ilang botos.
Kun ang tumong gud sa katawhan mao nga dili padag-on si Vice President Binay pagka presidente, unya mabuak-buak lang ang botos tungod sa daghang mga kandidato, hayan makadaog si Binay.
Sugot ba mo nga makadaog si Binay? Sa akong bahin, dili g’yud maayo nga botohan si Binay hangtud nga matataw niya nga wala siya makahimo og kurapsyon atol nga mayor pa siya sa Makati City.
Aw, hinuon, mura’g ang mga tawo miitsa-puwera na man g’yud ni Binay. Ang gihisgotan karon pag-ayo mao na man si Grace Poe ug giisip nga lig-ong kontra ni Mar Roxas, kay si Rodrigo Duterte wala pa man mopahibalo nga siya modagan pagka presidente.
Kang Roxas ug Grace Poe, layo ra g’yud kaayo si Grace uy. Ikatandi siya sa kumingking ra ni Roxas sa natad sa panerbisyo. Matud ni Grace Poe nga ang tugon sa iyang amahan nga si Fernando Poe sa wala pa mamatay nga “Ipagpatuloy mo ang naumpisahan ko.”
Nagtuo ko nga wala lang masabti ni Grace Poe ang kahulogan niini. Ang gipasabot ni FPJ mao nga ipadayon ang ilang negosyo sa pelikula kay aduna man sila’y FPJ Productions.
Apan pastilan, kaambisyosa g’yud niining Grace Poe. Abi kay misikat man siya tungod sa pagpangulo niya sa imbestigasyon sa Mamasapano massacre, uy, misakay man og gusto na nga magpresidente.
Dili g’yud hinuon ko mosakay sa usa ka bus nga ang drayber dili makamao nga mo-drive. Ang resulta ana, maaksidente g’yud ta. Sama ra kana kun ang pagdumala sa atong nasud itugyan nato ni Grace Poe nga walay kasinatian. Unsay mahitabo?
Bise presidente unta, mahimo ra aron magtuon usa siya sa trabaho sa pagka presidente. Apan pastilan, ambisyosa nga pagkatawo. Giitsa-puwera niya ang iyang pagka Filipino citizen diha nga mi-apply si Grace Poe pagka US Citizen, unya karon, gusto nga magpresidente?
Simbako! Dili g’yud angayan si Grace Poe nga suportahan sa iyang pagka ambisyosa