Modeklarar na si Poe

Hilom g’yud kaayo ang Bando Osmeña Pundok-Kauswagan (BOPK) kay hangtud karon wala pa sila mobutyag sa ilang mga kandidato nga molangkob sa ilang mga konsehal dinhi sa dakbayan sa Sugbo.

Sa Team Rama, gibutyag na man ni Mayor Michael Rama ang pasiuna’ng pito nga molangkob sa ilang line-up sa south district. May gibutyag na ‘sab nga mokandidato sa north district.

Apan ang BOPK wala pa g’yud mobutyag. Hasta kami nga mga reporters gusto na nga masayod kay hapit na ang pagpasaka sa certificates of candidacy nga magsugod Oktubre 12.

Matandi na nato kun kinsa ang angay nato nga botohan ug padag-on. Aw, sa pagka mayor hinuon, sigurado na man nga sila si Rama ug kanhi mayor Tomas Osmeña ang magsangka pagbalik pagka mayor.

Kini hinuon, fight g’yud kaayo kay samtang napilde ni Rama si Tommy sa eleksyon kaniadtong 2013, sigurado ko nga dili na mokumpiyansa pag-usab si Tommy niini’ng higayona.

Tan-aw nako, pulos sila lig-on nga kandidato pagka mayor.

* * *

Sa Mandaue, sigurado na usab nga ang magsangka pagka mayor mao sila si Kongresista Luigi Quisumbing ug Konsehal Lollipop Ouano-Dizon.

Kini hinuon, mabana-bana g’yud nga nakabentaha si Lollipop kay ni Luigi tungod kay dugay na kaayo nga nahimo’ng suod ang konsehal nga apo ni kanhi mayor Pedong Ouano ngadto sa mga kabus.

Pareho sila si Luigi ug Lollipop nga mga adunahan, apan dili kaayo makigsuod si Luigi sa mga kabus samtang si Lollipop mohangop gayud kanila bisan og wala pa’y eleksyon.

Apan natan-aw hinuon nako nga mura’g si Luigi ang himoong standard bearer sa Partido Liberal mao nga si Gobernador Junjun Davide naglisud pagprangka ni Lollipop.

Anhi dinhi ang dako’ng problema ni Davide kay si Lollipop makadawat ra nga dili siya maoy himoong standard bearer sa Liberal apan dili usab siya modala sa mga kandidato sa LP.

Sa ato pa, apektado ang kandidatora ni Mar Roxas pagka presidente diha sa Mandaue tungod kay daghan ra ba og mga dumadapig si Lollipop kay kang Luigi. Mao kini nga angay’ng timbang-timbangon pag-ayo sa kadagkoan sa LP kun kinsa ang ilang himoong standard bearer diha sa Mandaue.

* * *

Mura’g si Senador Grace Poe modeklarar na g’yud nga siya molansar pagka presidente. Tan-awa unya, dili ba motibugsok ang popularity rating ni Poe niini.

Nakasabot ko nga ang mga tawo gusto nga si Poe mag-bise presidente lang g’yud. Diha nga nakasabot ang mga tawo nga gusto g’yud ni Poe nga mahimong presidente, mura’g nasukamod ang rating ni Poe.