EDITORYAL - Kapanaminan sa ginikanan

Ang tukma nga paggiya sa mga ginikanan sa ilang mga anak maoy paagi nga ang kabataan dili motipas sa pagsubay nila sa matarong nga dalan sa kinabuhi.

Bisan og adunahan pa ang mga ginikanan, bisan og daghan pa sila og salapi nga ikahatag sa ilang mga anak alang sa kaugalingon nila nga panginahanglan, apan dili kini basehanan nga ang ilang kabataan mosubay g’yud sa dalan sa katarong.

Dul-an sa 50 ka batan-on, apil ang 13 ka dalagita ug nuybe anyos nga batang babaye, gipang-rescue sa mga tinugyanan sa Cebu City Hall ug kapolisan gikan sa ilawom sa duha ka taytayan sa Mabolo ug Banilad nga ilang giestahan.

Ang mga bata misaysay nga adunay problema ang ilang pamilya, ang mga ginikanan sa ubang libudsuroy nga kabataan nagkabuwag, ug wala na sila maatiman.

Ang mga layas nga kabataan nadani sa pag-ipon sa grupo sa mga libudsuroy ug sila nakat-on usab sa paghingos og rugby ug ubang volatile substances, ingon man shabu.

Ang uban sa mga libudsuroy nga bata’ng lalaki nakat-on usab sa pagpangawat ug pag-armas sa ilang kaugalingon sa mga mahait nga hinagiban.

Sa laktod, ang mga bata nga kanhi mga buotan diha nga didto pa sila uban sa ilang mga pamilya, karon nahimo na gayud nga badlongon sa katilingban.

Angay kini nga panaminan sa mga ginikanan nga amomahon g’yud nila ang ilang mga anak ug ibaid kanunay sa ilang alimpatakan ang mga maayong mithi sa pagkatawo.