Giantos intawon sa mga Persons with Disabilities (PWD) ang kahasol sa biyahe, taas nga linya ug ang kainit sa adlaw aron lang makuha ang tag usa ka libo ka pesos nga hinabang pinansyal kanila gikan sa kagamhanan sa dakbayan sa Sugbo kaniadtong niaging Biyernes.
Dunay mga nagsakay og wheelchair, dunay mga giagak sa ilang pamilya tungod kay dili na makakita ug uban pa nga makalulooy nga talan-awon atol sa naasoy nga financial assistance distribution.
Gikan sila sa nagkadaiya nga baranggay sa dakbayan nga mibiyahe sakay sa mga bus sa barangay padu’ng sa Plaza Sugbo o sa atubangan sa Cebu City Hall.
Medyo nagkaguliyang ang pagpanghatag sa salapi tungod kay mikobra man usab ang mga senior citizens nga karong adlawa pa unta mokuha sa ilang financial assistance.
Miscommunication ang gitumbok nga hinungdan sa naasoy’ng kaguliyang.
Apan alang sa mga hingtungdang PWD nga akong nahinabi, ang dako’ng isyu mao ang paglisud-lisod kanila nga susama sila sa mga manok nga gikurok aron patuktokon sa mga gisabod nga mais sa tugkaran sa City Hall.
Gamay’ng konsiderasyon lang ang ilang gipangayo nga unta didto nalang sa ilang tagsa tagsa ka barangay ipanghatag ang financial assistance aron dili na mabutang sa peligro ang ilang kinahuhi nga tandugon na kaayo, gamay’ng bikil sa lawas posible nga mohatod kanila sa kamatayon.
Hinaut unta nga dili na mausab pa ang ingon niadto nga sistema aron wala’y madisgrasya.