Usa ka adlaw human niangkon og kadaogan ang Iglesia ni Cristo (INC) sa lima ka adlaw nilang protesta, nibalik sa iyang buhatan si Justice Secretary Leila de Lima ug gipadayon ang iyang naandang gimbuhaton sa pagsusi sa nag-ung-ong nga mga kaso nga gipasiugdahan o igo lang nadawat sa Department of Justice (DOJ).
Usa sa mga kaso nga igo lang nadawat sa DOJ apan kinahanglan nga susihon ni de Lima mao ang seryosong pasangil sa gipalagpot nga ministro sa INC, si Isaias Samson Jr., nga gitanggong siya ug ang mga sakop sa iyang pamilya sud sa siyam ka adlaw sa iyang pinuy-anan sa Quezon City.
Kun mao, unsa may nadag-an sa INC?
* * *
Ato ning klaruhon. Wa mangangkon og kadaogan ang tigpamaba sa INC nga si Bienvenido Santiago sa opisyal niyang pahibawo sa pagkahunong na sa protesta. Igo lang siyang niingon nga nagkasulti ang mga opisyal sa INC ug sa gobiyerno, nagkasabtanay na ang duha ka bahin ug malinawon na ang tanan.
Ang mga propagandista sa INC maoy nangangkon nga gihatag sa gobiyerno ang tanan nilang gipangayo. Ug klaro nga ang ilang linya maoy nipatigbabaw. Tungod sa gipahigayon nga misa sa pasalamat ug nasudnong kasaulogan sa pagdaog sa ilang panaghiusa batok sa pagsuway sa DOJ pagpanghilabot sa kalihokan sa ilang simbahan.
* * *
Wa may ganahang mosulti unsay tinuod nga nahitabo, suwayan nato og subay ang mga insidente nga nisangpot sa paglibkas sa protesta sa INC:
Gibalibaran ni Presidente Noynoy Aquino ang awhag sa kadagkoan sa INC pakigtagbo niya maong ubang mga opisyal sa gobiyerno na lay ilang gikasulti pinaagi sa telepono niadtong Domingo sa gabii;
Nakigtagbo si Aquino sa mga sakop sa gabinete nga nahilambigit sa seguridad hangtod sa ala-1 sa kadlawon sa Lunes; ug
Gitakda untang makigtagbo si kanhi Interior Secretary Mar Roxas sa kapolisan sa Kampo Crame sa Lunes sa buntag apan naapsan sa pahibawo paghunong sa protesta.
Kun tinuod pang may kauyonan, gipahibawo na unta niadtong Domingo sa gabii, sa wa pa makagasto og dako ang mga sakop sa INC sa Sugbo ug ubang bahin sa nasud pagbiyahe alang sa protesta nga gihunong sa wa pang kasugod.
* * *
Mas dako ang kahigayonan nga way bisan unsang nakuha ang INC gikan sa gobiyerno. Nga igo lang nihatag ang Malakanyang og “graceful exit” sa kadagkoan sa relihiyosong pundok. Nga inay mag-imbento og kadaogan angay’ng mamalandong sa mosunod:
Minilyon ang giangkon nilang mga sakop, apan pila ka libo ray niapil sa ilang protesta;
Lubog nang daan ang orihinal nilang kawsa, mas nalawgaw pa dihang gipasaka sa entablado ang laos nga mga politiko; ug
Nipalayo ang inilang mga politiko nga nipadayag og pasiunang suporta sa protesta dihang ang katawhan nikondenar nila.