Sagad, wala g'yud nato kini mahatagi'g pagtagad kun unsa ang kabililhon sa atong atay. Mao kini ang una'ng mosakripisyo, sa unsa ma'y isulod nato nga pagkaon sa lawas. Susama kini nga mora'g detektor, nga mokilatis ug mo-um-om sa mga ikadaut sa sistima sa panglawas, mao nga mabun-og o madaut kini.
Himuon sa atay, kutob mahimo, suyopon o kuhaon ang mga toksik o hilo, una kini hilison ug salaon, aron isirkular ang mga nutreyens. Tungod kay hago kaayo ang trabaho sa atay, mahutdan kini sa apdo, ug dinhi inanay ang sakit sa atay molamay, mapuno sa tambok nga may abnormal nga manurok, ug sayon na motapot ang mga 'virus', nga momugna'g mga lainlaing sakit sa atay.
Busa, matngonan ang atay nga dili maabuso, pinaagi sa dili nga naghinubra sa mga pagkaon o pag-inom nga asidik ug toksik, sama sa alkoholik nga ilimnon, mga proseso o pormulado'ng pagkaon sagad kontaminado sa makahilo nga kemikals. Di kita mokompiyansa nga magpataka lang bisa'g unsa'y isud sa tiyan, ilabi na'g huyang na ang ato'ng sistima sa imyun, makakomplikar ni'g mga sakit.
Magkat-on kita unsaon ang pag-atiman sa atay nga mohimsog. Matud sa mga eksperto, mentras di pa grabe ang kondisyon sa atay mo, sayon ra ang buhaton, nga mao ang pagbag-o sa estilo sa kinabuhi mo. Seguroa nga pursigido ug seryosohon mo ang mga pagkaon ug pag-inom, nga dili makadaut sa atay. Naa'y dagha'ng maayong kaonon o imnonon nga makapabaskog sa atong atay.
Angay nato'ng mahibaloan, nga kun mahutdan na sa mga nutreyens ang atay, dili kini dihadiha moepekto ang grabeng kadaut, kay aduna ni mga hugna nga inanayon ka'ng inutilon ang trabaho sa imong atay. Gikan sa (1) Mapuno kini sa tambok.. (2)Hepatitis - implamasyon o impeksyons..ug ang ika (3) Cirhossis- mokupos ang atay kay barado na ang mga agianan sa dugo niini.