Gabii kadto, daw sa gibati ko ang tumang kalaay nga bisan gani ang pagtagik sa script alang sa drama sa DYHP malisud. Sa laktod wa mogana ang akong imahinasyon. Ako lang kining gikatulog ug talukahaw lamang akong nakita ang usa ka pari nga sinati nako nga mapahiyumon kaayo kanako.
Nikumpisal ko ug human iyang gidihogan ang akong duha ka mga kamot sa Krisma ug iya kining gihagkan sa hawok nga malolot. Nahigmata ako. Mga alas tres na diay sa kaadlawon. Wa ko makatulog hangtud na sa buntag. Padayon nakong gipangitaan og rason kun nganong ingon ato ang akong damgo. Mahimo tingali nga ang maong pari representation sa akong Idealism, ang krisma kalabot sa akong purpose ug ang paghalok tingali pahinumdom nga there must be something bigger than anything else.
Nga bisan pa man kun ang kamot representation sa pag-umol ug sa pagdagmal ang kamot dunay dakong bili diha sa kinabuhi sa pagpanaw. Diha man gud sa kinabuhing tawhanon sa makadaghan kita mohimo og mga detours sa pamasin nga makita nato ang katagbawan. Hapit na ang tuig 2016 bililhon kini nga tuig sanglit mahitabo man dinhi sa ato ang International Eucharistic Congress. Sa laing bahin mahitabo ang dako nga lahugay ug apil na niini ang lahugay nga mahitabo mismo sa akong kaugalingong kinabuhi. Ug kun unsa man kini manghinaut ko nga kini dili lang bunga sa duhiraw kondili bunga sa maampoong lakang nga tinukmod sa layat sa pagtuo.