Pormal nang gibuksan ang APEC SUMMIT 2015 dinhi sa Sugbo.Gani dili mo minos 300 ka sakop sa Bureau of Fire Protection 7 ang gi-dispatch sa nagkalainlaing venue aron moabag sa pagpatuman sa seguridad sa mga delegado sa maong dakong tigom sa mga world leaders.
Manghinaut lang kita nga wala’y kakulian nga mahitabo aron makasiguro kitang magmalampuson ang maong summit. Sa pikas bahin,namatikdan sa inyong kabomberohan ang nagkuyanap nga paggamit ug pagpamaligya anang gitawag nato nga butane gas.
Alang sa kasayuran sa publiko ang maong paggamit sa butane gas isip alternatibo sa LPG sa pagluto wala kini pagtugot sa atong kabomberohan ug gani gi-discourage namo ang publiko sa paggamit niini kay delikado kini.
Basi sa datos nga atong nadawat ubay-ubay na nga sunog diin ang paggamit sa butane gas ang hinungdan. Kun tigamit kamo niini, matikdi ninyo ang lata nga gigamit nga gisudlan sa maong gas mao ra sa lata sa sardinas ug posibleng dali ra kini mabuslot o ba kaha malanay. Maoy rason nga nagpadayon ang inyong kabomberohan sa pag- edukar sa publiko sa ka delikado niini.
Gani kadaghan na mipahigayon og kinalit nga inspeksyon atong kabomberohan sa mga refilling station sa maong produkto ug mihatag og warning ug rekomendasyon ngadto sa hingtungdan nga LGU sa hingpit nga pagpasira niini sanglit wala may pagtugot atong kabomberohan sa maong operasyon.Giawhag ang publiko sa paghunong paggamit niining butane gas sa pagluto aron makasigurong hingpit kitang luwas sa sunog.