Ato ning klaruhon. Sayop ang pagtukod sa Cebu International Convention Center (CICC). Sa way paghuwat kapamatud-an ba sa Sandiganbayan ang mga pasangil sa overpricing, splitting of contracts, paglaktaw sa mga lagda sa subasta ug ubang kahiwian, klaro na nga sayop ang pagpamugos ug pagdalidali sa pagtukod sa CICC tungod ug alang sa kalibotanong kalihokan nga mahimo ra untang ipahigayon sa mas tukmang dapit.
Wa unta mausik ang dul-an sa bilyon ka pesos sa buhis nga hinagoan sa mga Sugbuanon. Nagamit unta alang sa mas mapuslanon ug mas dinalian nga mga proyekto. Nga napatuman unta sa mas makiangayong paagi. Nga mas kapahimuslan unta sa mas daghang katawhan.
* * *
Sayop ang CICC kay samtang napilde nang daan ang mga Sugbuanon sa dako ug wa kinahanglanang gasto, magpas-an pa gyud sila og dugang gastohan paglahutay sa operasyon ini. Kay bisan sa wa pa dali ra kaayong naggusbat sa nagsunod nga linog ug bagyo niadtong 2013, alkanse nang daan ang CICC.
Mas daghang mga adlaw sa semana nga nagmingaw ug nagngiob ang dakong wanang sa CICC sa reclamation area sa Dakbayan sa Mandaue kay way booking. Sa talagsaon ra kaayong mga higayon nga may nasaag ug nangahas sa paggamit, wa pa gyoy klarong bayad kay kasagaran igo lang nagpahimus sa ilang suod nga koneksiyon sa mga kanhi nagtungkawo sa Kapitolyo.
* * *
Bisan sakto pang bayad sa CICC, nga mas nihit kay sa blue moon (duha ka takdol sa usa ka buwan), alkanse gihapon ang Kapitolyo. Kay usa sa napanid-an nga labing dakong buslot sa istruktura, nga mahimong nanukad sa pagdalidali o tungod lang sa kakuwang og tarung nga panglantaw, mao nga centralized ang airconditioning system.
Sa ato pa, gipaandar ang tibuok airconditioning system bisan usa ra ka gamay kaayong kuwarto sa CICC ang gikontrata. Bugtong paagi nga makabawi ang CICC mao nga ang tibuok istruktura maoy gamiton ug bayran. Nga wa mahitabo bisan atol sa ASEAN Summit niadtong 2007.
* * *
Maong wa maalkanse ang mga Sugbuanon dihang nihukom si Gobernador Junjun Davide sa paghunong na pagpamugos og gamit sa CICC. Hinunoa, naluwas sila sa dugang wa kinahanglana nga gasto. Kun ganahan ang Mandaue City Hall o ang Department of Trade and Industry (DTI) nga mobanos sa pagduma, angay silang mangaliya sa tanang anghel sa kalangitan.
Sa di pa nila pasanginlan si Davide nga nagpakauwaw sa Sugbo tungod sa kapakyas pag-ayo sa naggusbat nga CICC, ang iyang mga kaatbang maoy angay nga mas unang manlipaghong sa kauwaw. Kay sila ang namugos sa higanteng proyekto nga wa kinahanglana. Ug sila ang gipasanginlan nga nagwaldas-waldas ug nibulsa sa kuwarta nga gipuhonan og singot ug dugo sa ligdong nga mga Sugbuanon.