EDITORYAL - Sugbo mauwawan tungod sa strike

Usa ka pagpakauwaw sa mga Sugboanon kining umaabot nga strike sa mga sakop sa union sa mga mamumuo sa Kepco-Salcon Power Corporation (KEPCO) nga gitumong atol pa gyud sa pagbukas sa Asia-Pacific Economic Cooperation (APEC) meetings dinhi sa Sugbo.

Sa kadaghan sa mga petsa karong bulana o sa sunod buwan, kanang adlawa pa gyud nila gustong himuon ang strike nga posibleng moresulta sa pag-brownout sa mga hotels nga nahimutangan sa mga langyaw nga mga delegado ug sa ilang venues.

Kung ila kining buhaton, inay nga dunay mosimpatiya kanila gikan sa mga kadagkoan sa gobiyerno aron tabangan sila sa ilang kawsa, posible hinuong talikdan sila ug unya-unyaon na lang ang ilang giyangungo.

Kanang isyu sa ilang kahimtang karon diha sa kompanya, walay sala ang tibuok Sugbo kun nganong naingon niana ang nahitabo. Kun ang kompanya ang nakasala kanila, ang kompanya lang unta maoy ilang panimaslan ug dili ang tibuok Sugbo.

Dili husto nga petsa ang ilang gipili kay magbunga man hinuon kini og mas dili pa maayo tungod kay daghang maapektahan nga walay labot sa mga panghitabo diha sa KEPCO ug sa mga kawani niini.

Hinuon mipasalig ang mga kadagkoan sa Department of Energy-7, duna nay mga pagpangandam nga ilang gibuhat karon aron di maapektahan ang mga venues ug hotels diin nahimutang ang mga delegado.

Apan bisan sa pasalig sa DOE, di kini malilong sa mga delegado nga magpundo dinhi sud sa pipila pa ka mga adlaw alang sa sagunson nilang mga meetings.

Kini tungod kay manggawas man kini sa mga balita ug inay nga makadani og dugang pang mga investors nga gustong mamuhonan dinhi mawad-an na hinuon sila og gana.