Ang magdalidali, kuyaw madagma

Human angkona ni Kalihim Mar Roxas ang iyang pagka adunahan, pagka suplado ug pagka elitista, gibuhi niya pagbalik ang karaan niya nga imahe, ang pagka-Mr. Palengke. Mao kini iyang gigamit nga imahe sa diha nga mi-number one siya sa senado.

Mr. Palengke ang tubag ni Mar sa mga pagsaway sa iyang pagka adunahan nga matud sa iyang mga kritiko nakapalayo kaniya sa mga kabus ug masa nga mga botante.

Mao kini ang nakadaot nato nga mga Pilipino, dali kaayo mailad sa kaon-kaon ug bodol-bodol uban sa mga pobre. Apan nasayod kita nga pakitang-tawo ra g’yud ang ilang salo-salo sa mga pobre. Ang pakigpangaon sa mga kabus dili sukdanan sa pagka maayo nga lider.

Ang kinahanglan sa Pilipinas dili suod sa mga pobre, apan luyo sa iyang pagkaduol sa mga kabus ug masa, ang naggilak-gilak nga mga sakyanan, de aircon nga baboyan, mga mahalong manok pangsabong, balay nga adunay elevator, higdaanan nga de aircon, ug mga condominium nga posible pulos kinawkaw ang salapi.

Lider ang atong kinahanglan, dili kawatan.

Alang kanako, bisan adunahan ug elitista ang presidente, apan makamao modumala sa nasud nga mopaduol sa ekonomiya ug mopalayo sa kurapsiyon, mao kini tinuod nga makatabang sa mga pordoy, dili ang plastik,  bakakon, ug tigpakaaron-ingnon nga politiko sama ni Bise Presidente Jejomay Binay.

* * *

Kining balita nga walo ka mayor nga sakop sa Nationalist People’s Coalition sa La Union namalhin sa Liberal Party usa ka timailhan nga dili makatindog og siya ra ang NPC.

Kun mao kini, makuli nga makabarug og tarong ang kandidatura nilang Senador Grace Poe ug Chiz Escudero kun mopugos sila sa 2016 presidential election.

Dili paigo alang kang Grace kun ang iyang saligan mao ang pagpanguna sa survey. Ang resulta sa survey dili magasto alang sa pagpadagan og kampanya lukop nasud.

Mag-unsa man ang pagpanguna sa survey kun wala siya’y matunol nga campaign funds ngadto sa mga mayor ug gobernador nga maoy modala nilang Grace ug Chiz sa mga munisipyo, siyudad ug probinsiya sa adlaw sa eleksiyon?

Kun saligan nila ang amahan sa NPC nga si Danding Cojuangco, ang pangutana kun andam ba kini nga mo-bankroll sa kampanya nilang Grace ug Chiz?

Kun moingon sila nga adunay mga negosyante’ng andam mogasto, pila man? Paigo ba ikasugakod sa makinarya sa Liberal Party?

Dili angay magdali si Grace. Wala pa gani siya makakumpleto og usa ka termino sa iyang pagka-senador magpadala na hinuon siya sa sulsol ni Chiz nga mag-presidente.

Kini si Chiz sakay-sakay ra g’yud kini alang sa kaugalingon niya nga political survival kay wala man magsilbe ang iyang pakigminyo sa artistang si Heart Evangelista.

Ang magdalidali kuyaw madagma.